Ekainaren 11tik 13ra bitartean Puerto de Santa Maria (Cadiz, Espainia) espetxeraino egingo dute martxa Nafarroatik. Ekimen horren inguruan bitakora bat jarri da sarean: http://www.blogak.com/puertora. Bertan bideoak, audioak, kartelak, dosierrak… eta informazio ugari aurki daiteke. Besteak beste, Aitor Cotano euskal preso politiko algortarra dago Puerto III espetxean dago; eta Algortako beste gazte bat, Iñigo Gutierrez, Puerto I espetxean. Puerto I, Puerto II eta Puerto III espetxe desberdinak dira, baina hirurak daude eremu baten barruan, Uribe Kostako Amnistiaren Aldeko Mugimenduak Etengabe bitakoran zehaztu duenez. Puerto de Santa Maria Algortatik ia mila kilometrotara dago, autoz joateko. Argazkian, Cotano eta Gutierrez atxilotu zituztenean Algortan egindako mobilizazioetako bat.
Aipatu bi lagunak, Arkaitz Goikoetxea getxoztarra, Mikel Saratxo algortarra eta beste 5 lagun ere 2008ko uztailaren 22an atxilotu zituen Guardia Zibilak; Bilbon, Algortan, Elorrion, Galizian eta Malagan egindako operazioan, Bizkaia komandoko kide edo laguntzaile izatea leporatuta. Bi egun geroago Inge Urrutia algortarra harrapatu zuten eta handik hiru egunera aske utzi, Adur Aristegi eta Libe Agirre elorrioarrekin batera, 12.000 euroko fidantza ordaintzeko baldintzapean. Saratxo urriaren 31n libre geratu zen. Guztiek torturak salatu zituzten. 2010eko urtarrilaren 14an, berriz, Gutierrez eta Cotano auziperatzeko autoa plazaratu zuen egun guztien ahotan dagoen Baltasar Garzon Espainiako Auzitegi Nazionaleko epaileak. Getxo zein Algortako Arkaitz Goikoetxea, Aitor Artetxe, Asier Borrero eta beste zortzi laguni bezala, 2007 eta 2008 urte bitarteetan zortzi atentatutan parte hartzea leporatzen diete bi gazteei.
Ikusi ekimenaren sustatzaileek zabaldutako bideoa:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.