Bi hilabeteren ondoren, Arabako ustezko ustelkeria auziaren sumarioari sekretua kendu zion joan den ostiralean Gasteizko Auzitegiko 4. Instrukzio epaile Roberto Ramosek. Beste hiru lagun inputatu ditu bertan. Hortaz, guztira, 11 lagun daude ustelkeriaz akusatuta. Berri agentziek zabaldutakoaren arabera, Gurutz Larrañaga da inputatu horietako bat. Juan Jose Ibarretxe lehendakariaren gobernuan Kultura sailburuorde izandakoa da Larrañaga. Inputatuta egonda ere, epaileak ezin izan dio deklaraziorik hartu, Espainiatik kanpo dagoelako, iturri horien arabera. Araba, Bizkai eta Gipuzkoako Parke Teknologikoen Sareko presidente ohi Julian Sanchez Alegria eta Miñaoko Parke Teknologikoko (Araba) teknikari Miren Bilbao dira oraingo beste bi inputatuak .
Auziari buruzko auto mardula kaleratu du instrukzio epaileak: 19 ale eta 4.772 orrikoa. Martxoaren 17tik, Ertzaintzak Araban zortzi lagun atxilotu zituenetik, egindako ikerketak jaso ditu bertan. Orduan, EAJrekin zerikusia zuten hainbat lagun atzeman zituen Ertzaintzak: Alfredo de Miguel EAJko Arabako diputatua, Ainhoa Bilbao haren emaztea, Alfonso Arriola Miñaoko Parke Teknologikoko zuzendari ohia, Aitor Telleria Gasteizko Udaleko EAJko zinegotzi ohia eta EAJko ABBko ordezkaria, Araceli Bajo haren emaztea, Iratxe Gaztelu Eusko Legebiltzarreko azken hauteskundeetan EAJko hautagaia izandakoa eta Koldo Otxandiano Arabako Ongizate Institutuko zuzendari ohia. Influentzia trafikoa, eroskeria eta dirua zuritzea delituak leporatu zizkien epaileak atxilotutakoei.
Lurren salerosketa
Auziaren sumarioan izen berriak ez ezik, epaileak delitu berriak ere egotzi dizkie 11 inputatuei: zehazki, prebarikazioa, diru publikoa xahutzea, dokumentuak faltsutzea eta lehiaketa eta enkante publikoetan salneurriak aldaratzea. Dena dela, epaileak ez dizkio inputatu bakoitzari delitu guztiak leporatzen. Arabako auzian ustezko hirigintza ustelkeria ikertzen ari da epailea, eta berri agentziek autoari aipamen eginez zabaldu dutenez, lurren salerosketarekin du zerikusia ustezko ustelkeria kasuak. Zehazki, Miñaoko Teknologia Parkeko lurren salerosketagatik komisioak jasotzea leporatu die epaileak inputatu batzuei.
Iñaki San Juan Leioako EAJko zinegotzi ohia nahastu dute Arabako ustezko ustelkeria kasuan
Arabako ustezko ustelkeria kasuaren sumarioa sekretupetik atera eta gero, Uribe Kosta eskualderaino ere iritsi dira hondarrak. "El Pais" egunkari espainolak zabaldutakoaren arabera, Ortzi Muga eta Errexal enpresak ere nahastuta omen daude aipatu auzian. Biak ala biak Gasteizen daukate egoitza. Azken hori, gainera, "amarru egileen diru bilketarako bulegotzat" jo duten Kataia sozietatea lekututako toki berean. "El Pais"-ek dioenez, 1999an Leioako EAJko zinegotzi izendatutako Iñaki San Juan Bilbao da Ortzi Muga (2006ko apirilean eratua) eta Errexal (2005eko urrian sortua) enpresen "administratzaile bakarra". Hala ere, ez dute inputatutzat jo. Sumarioan jasotzen denez, inolako lehiaketa publikorik egin gabe, hainbat kontratu esleitu zituen Eusko Jaurlaritzako Kultura Sailak, exekutiboko buru Juan Jose Ibarretxe jelkidea zela. Horietatik 16 San Juan leioaztarraren Errexal enpresari, bakoitza 12.000 euro baino gutxiagoko zenbatekoan. Orotara, 150.000 euro baino gehiago. Argazkian, Leioako udaletxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun