Naiara Billalabeitiak gogoratu duenez (mp3), Bizkaiko Trikitixa Elkartearen helburuen artean daude trikitixa sustatzea eta hedatzea eta baita trikitilari zein zaleen bilgunea izatea ere. "Formazioa, dokumentazioa eta sustatzearen ardatzak lantzen ditugu eta horien artean kokatzen da Bizkaiko Trikitixa Eguna antolatzea, horrek ere elkartearen zeregina zabaltzeko balioko baitu. Gure asmoa urtero herri desberdin batean egitea da", agindu du Billalabeitiak.
Bere aldetik, Jon Iñaki Zarraga Foru Aldundiko Kultur zuzendariak azpimarratu du (mp3) folklorea bizirik mantentzeko eta indartzeko garrantzia: "musika, dantzak eta folklorea direlako herri bezala dugun nortasuna eta bizitzeko moduak, zerbaiten parte garela erakusten dutenak. Horregatik igandean Getxon egongo gara gurearekin eta Aldundiak Bizkaiko eta Euskadiko arte eta kulturaren aldeko apustua egingo du”.
Ildo berean, Josu Loroñok nabarmendu du (mp3) "Getxon oso pozik gaudela Trikitixaren Egunaren lehenengo edizioa herrian ospatuko delako”. Era berean, gogoratu duenez, "Getxon trikitixa zabaltzeko ahalegina egiten ari gara eta egingo dugu, hainbat ekitaldi egiten ari garelako aspalditik, ekitaldi xumeak batzuk eta baita arrakastatsuagoak ere, tartean Musika Eskolako irakaskuntza eta duela hiru urtetik honako Nazioarteko Trikitixa Jaialdia".
Bizkaiko Trikitixa Eguneko egitaraua, igandean, maiatzak 23:
- 12:00etatik aurrera kalejirak Algortan zehar trikitixa eskolekin.
- 14:30etan trikitixa eskolen topaketa Algortako Tellagorri plazan.
- 15:00etan bazkaria Algortako Zabala Eskolan.
- 17:30etan erromeria Triki ta ke taldearekin Algortako Tellagorri plazan.
150 bat trikitilari batuko dira igandean Algortan Bizkaiko Trikitixaren lehenengo edizioaren ospakizunean. Ekimena Bizkaiko Trikitrixa Elkarteak antolatu du eta bertan sei eskolatako ikasleek eta zaleek parte hartuko dute, Bizkaian dauden bostetatik eta Gipuzkoako beste batetik etorriak. Batzuek zein besteek udalerriko kaleak alaituko dituzte. Egitaraua gaur aurkeztu du Algortan Naiara Billalabeitiak, Bizkaiko Trikitixa Elkarteko ordezkariak, ekimena laguntzen duten Bizkaiko Foru Aldundiaren eta Getxoko Udalaren ordezkari banaz lagunduta. Eguna eguerdian hasiko da trikitilarien etorrerarekin eta Algortako kaleak animatuko dituzten trikitixa eskolen kalejiraren hasierarekin. 14:30ean elkartu egingo dira Tellagorri plazan, ondoren Zabala eskolan bazkaria egiteko. Jardunaldiari amaiera emateko 17:30etik aurrera erromeria izango da Tellagorri plazan Triki ta ke taldearekin. Argibide gehiago www.bizkaikotrikitixaelkartea.com webgunean topa daiteke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun