Barrikan hasi eta Armintzan amaitu, orotara, 1.400 hektarea baino gehiago hartzen duten bost habitat (pdf, espainolez) ezberdin babesteko batu dira talde ekologistak. Bakarka, erakunderen baten babesa badaukate, baina, naturalisten iritziz, "hori ez da nahikoa, eraikiz edo, honda ditzaten". Hori dela eta, Uribe Kosta-Butroe izena jarri dioten eremua "bere osotasunean" biotipo babestua izendatzea eskatu dute. Bide horretan, astelehenean daukate lehenengo hitzordua naturalistek. Egun horretan, Bizkaiko Batzar Nagusietako alderdi politikoen ordezkariekin bilduko dira. Guztiekin, EAJ eta PPkoekin izan ezik. "Agenda arazoak" tarteko, ezin izango dira bertan egon. Gainera, lehen aipatu udaletako zinegotziak ere bertan egotea eskatu dute talde ekologistek.
Aberastasun handiko gunea
Uribe Kosta-Butroe eremuan dira, besteak beste, Barrika eta Gorliz-Armintzako itsas labarrak eta Billano uhartea; Barrikakoa bezalako itsasertzeko txilardiak; Astondo, Gorliz-Plentziako badia-hondartzak eta Barrikako kalak; Astondoko duna zementatu eta higikorrak, Barrikako duna altxatuak eta Gorlizko duna antropizatuak; Gorlizko artea, Barrikako hariztia eta Lemoizko artelatz basoa; eta Butroe ibai sistema.
Butroe ibaiaren estuarioaren aberastasunaren kontserbazioa ziurtatzen duten baldintzak sortzea eskatu diete administrazio publikoei Astondopunta, Eguzki, Ekologistak Martxan, Espitzu, Lannius, Sagarrak, Talaia, Txipio Bai eta Txirpial talde ekologistek. Horren inguruan batzen diren ekosistema isolatuak (itsas labarrak, itsasertzeko txilardiak, badia eta hondartzak, duna sisteman, basoak...) "hauskortasun handikoak" dira naturalistek aipatu dutenez. "Soilik inguru handiago baten kudeaketa integral batez ziurtatu dezakegu haien biziraupena", ohartarazi dunez. Hartara, Uribe Kosta-Butroe Biotopo Babestuaren izendapena helburu duen prozesuari ekiteko eskatu diote publikoki Eusko Jaurlaritzari. Helburu hori lortzeko, Lakuako exekutiboari ez ezik, Bizkaiko Batzar Nagusiei zein Barrika, Plentzia, Gorliz, Lemoiz eta Gatikako Udalei ere galdegingo diete eskari hori berrets dezaten. Argazkian, Alex Cearreta geologoa, Iñaki Ortigosa Txipio Baiko presidentea eta Joserra Ortiz Ekologistak Martxaneko kidea, gaur goizean Bilboko Ekoetxean eskainitako prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun