2009 bukaeran izandako polizia operazioaren ondotik dator biharko mobilizazioa. Iragan azaroaren 24an, 34 neska-mutil atxilotu zituzten, Segiko kideak zirelakoan. Sarekada horren baitan, hilabete beranduago, eskualdeko gazte bat ere atzeman zuten. "Inkomunikazio aldiko galdeketetan jasandako torturen bidez, bere buruaren kontrako erruztapenak egiteaz gain, Uribe Kosta eta Erandioko 10 gazteren aurkako erruztatzeak sinarazi zizkioten. Ondorioz, eskualdeko 10 neska-mutilen izenez osatutako zerrenda beltza egin zuen Poliziak. Edozein unetan, egoera politikoak hala eskatzen duenean, horiek ere atxilotuak, torturatuak eta espetxeratuak izateko arrisku bizian aurkitzen dira", salatu dute deitzaileek.
Bestelako mobilizazioak Uribe Kosta eta Erandion:
Erandio
19:30 Elkarretaratzea metro geltoki ondoan.
Itzubaltzeta / Romo
20:00 Manifestazioa Kolas plazatik abiatuta.
Atxilotze arriskuan dauden gazteen aldeko aldarrikapen eguna deitu dute biharko Algortan
"Torturarik ez! Ilegalizazioei ez! Proiektu guztien garapenari bai!" lemapean, hainbat mobilizazio deitu dituzte Uribe Kosta eta Erandion ostiral honetarako, maiatzak 21, atxilotze arriskuan dauden eskualdeko gazteei babesa adierazteko asmoz. Besteak beste, Algortako Telletxe plazan ekitaldi anitzeko aldarrikapen eguna egingo dute 18:00etatik aurrera, amaitzeko elkarretaratzea ere izango dela. Horretaz gain, sinadurak batzeko mahaia jarriko dute. Izan ere, Algortan, "Torturarik ez! Ilegalizazioei ez! Proiektu guztien garapenari bai!" lemapeko adierazpenaren osagarri, beste bat plazaratu dute, horren alde ere izenpeak batzeko asmoz. Bigarren adierazpen horretan Imanol Landa Getxoko alkateari zuzentzen zaizkio, "herritar guztien ordezkaria den heinean, bere eskuetan dagoen guztia egin dezan, etorkizunean gerta daitekeen egoera lazgarria ekiditeko". Bestalde, Arartekoari ere egiten diote eskakizuna, "eskubide zibil eta politikorik gabeko egoera honekin bukatu eta, horrekin batera, herritarrek ukan beharreko eskubideak berma ditzala, gazte horiei babesa emanez". Azkenik, larunbatean, hilak 22, Iruñean izango den nazio manifestaziora deitzeko baliatuko dute biharko eguna. Protesta 18:00etan abiatuko da Golem zinemetatik. Argazkian, maiatzaren 7an eskualde mailako manifestazioa egin zuten Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun