Festiclown Palestina jaialdia urriaren 25etik 31ra egiteko asmoa daukate. Beste beste, ekitaldiak, errefuxiatuen kanpamentuetara bisitak, harresiaren kontrako ekintza artistikoak, tailerrak, galak eta topaketak egongo lirateke. Dagoeneko nazioarte mailako hainbat artista ezagunek eman diote babesa ekimenari. Horien artean dira, Leo Bassi, Amparanoia musika taldeko abeslaria, zirku munduko Elliot (Belgika) y Alba Sarraute (Katalunia), Jorge Blas (Madril) magoa. Azken horiek jaialdian parte hartuko dutela adierazi dute.
Hala ere, Festiclown Palestina jaialdiaz jardun aurretik, Galiziako Nazioarteko Clown Jaialdiaz arituko da Leioan Ivan Prado. Mike Ribalta FiraTarrega Tarregako antzerki jaialdiaren arduradunarekin eskainiko du “La internacionalización de las Artes de Calle” izenburuko mahai-ingurua artista galiziarrak. Hitzordua bihar bertan jarri dute Kultur Leioako entzungelan, 10:00etatik 14:00etara. Hala ere, parte hartzeko, Artekalerekin (info[abildua]artekale.org) harremanetan jartzea beharrezkoa da.
Galiziako Pallasos en Rebeldia taldeko kide Ivan Pradok ere parte hartuko du aurtengo Leioako Umore Azokan. Apirilean Israeldik kanporatu zuten artista galiziarra Palestinara zihoala, udazkenean bertan egin nahi duen clown jaialdiko prestaketa lanekin jarraitzeko. Sei orduz atxiki zuten Ben Gurion aireportuan segurtasun indarrek, bere itzultzailearekin batera; eta "inolako azalpenik eman gabe" bueltatu zuten Espainiara. Festiclown Palestina ekimenaren sustatzaileak “Mashi: trasi que trasi!” izenburuko dokumentala eta liburua aurkeztuko ditu larunbat honetan, maiatzak 22, Kultur Leioako auditorioan. Ikus-entzunezko lana 2009ko apirilean grabatu zuen Edu Alterrek. Bi astez, Ramala eta Nablus hiri palestinarretan egon ziten Pallasos en Rebeldia taldeko kideak, bertan clown eta barre terapia tailerrak eskaintzeko asmoz. Aipatu ekimenean, nagusiki, haur, gazte eta tratu txarrak jasandako emakumeek parte hartu zuten. Milatik gora, antolatzaileen arabera. Hori izan zen Festiclown Palestina 2010 jaialdiaren hazia. Argazkian, Ivan Prado 2009ko apirilean Ramalan / © Festiclown.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun