Goizeko ekitaldien bukaera gisa, bazkaria egingo dute ikastolako guraso eta ikasleek, indarrak hartu eta arratsaldeko saioetarako prestatzeko. Arratsaldean karaokearekin hasiko dira 16:30ak aldera, ordu bat beranduago hiru musika talde gazteren emanaldiak ikusi ahal izateko. Taldeak, hauexek: Basatiak, Umore txarrez eta Garrasika, hirurak ikastolako ikasle eta ikasle ohiez osatuak. Horien ostean etorriko da Herri Kirolen Txapelketa, ikastolako ikasle eta gurasoen artean burutzekoa. Arratsalde osoan zehar, gainera, puzgarri handi bat egongo da ume txikien gozagarri.
Ikastolak etengabe sendotzen dihardu
Gainera, aurten, Betiko ikastolaren ikasle zein gurasoek badute zer ospatu ere: ikastolaren eraikin bien arteko jolaslekua guztiz estali berri du ikastetxeak, eguraldi txarra eta, batez ere, euria egiten zuenean alde bietatik guztiz itxita ez zegoenez, jolaslekua eta umeak bustitzea baitzekarren horrek.
Betiko ikastolak 452 ikasle izan ditu 2009-2010 ikasturte honetan zehar, ziklo ezberdinetan. Datorren ikasturtean, berriz, 500 bat ikasle izatea espero da, aurtengo aurrematrikulazioari erreparatuta. Sendotze bidean dago, beraz, Leioako ikastola, behetik bi lerro baititu maila ezberdinetan. Horretaz gain, 0-2 urte bitarteko haurtzaindegia dauka ikastolak, goizeko 8etatik arratsaldeko 6:30era zabalik. Uztailerako, gainera, eskaintza zabala atondu du: haurtzaindegiaz gain, 3, 4 eta 5 urteko umeentzat zaintza zerbitzua eskainiko du, eta baita udaleku irekia ere, Leioako Udalarekin elkarlanean. Udaleku ireki horren helburu nagusia euskararen erabilera sustatzea da, eta zehatzago emozioen adierazpenean euskaraz trebatzea. Horrela, "euskararen normalizazioaren bidean, aisialdiari duen garrantzia eman nahi zaio, hizkuntza geletatik ateratzeko lanean ahalegina eginez", ikastolako kideek adierazi dutenez. Negu gorria atzean utzita, udaberriko eta udako eguraldi koloretsu eta beroaz gozatzeko ari dira prestatzen Betiko Ikastolan, beraz.
Leioako Betiko ikastolak bihar, larunbatez, ohiko duen ikasturte bukaerako jaia egingo du. Hori dela eta, egun guztian zehar egitarau zabala (pdf) burutuko dute bertan. Goizean, saskibaloi partiduak, gelaz gelako ikasleen emanaldiak (dantzak, kantak...) eta eskolaz kanpoko ekintzetako ikasleen saio txikiak (txistua, musika, dantzak, adierazpen tailerra, panderoa) izango dira. Aipatzekoa da Betiko ikastolaren haur mailako saskibaloi nesken taldea Bizkaiko eskola arteko deman txapeldun geratu dela aurten, eta Bizkaiko ordezkari arituko dela maiatzaren 22an eta ekainaren 5ean Barakaldoko Lasesarre kirolgunean egingo den Euskadiko Txapelketan. Hori dela eta, bihar aipamen berezia jasoko dute ikastolako neska kirolari horiek. Eguna ekimenez betea egongo da, tartean herri bazkaria eta Basatiak, Umore txarrez eta Garrasika bertako musika taldeen kontzertua izango dela. Argazkian, Garrasikako partaideak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun