Getxoko Andra Mari kiroldegia zabaldu zuten joan den larunbatean, hilak 22, bertako teilatua konpontzeko lanak amaitu ostean. Eraikina zaharberritzeko obrak urtebete inguruz luzatu dira eta 560.000 euroko inbertsioa eragin du, Toki Inbertsiorako Estatu Funtsaren kontura. Irekierarekin batera, ikasle getxoztarrek ekaineko azken azterketak prestatzeko eta ikasteko lekua izango dute bertan. Izan ere, Getxo Kirolak udal erakundeko kiroldegietako ikasgelak bete beteta egoten dira egun horietan. Alvaro Gonzalez Kirol zinegotziak adierazi duenez, "zaharberritzeari esker kirol instalazio hobeagoak ditugu, eta horien erakusgarria pilotalekua izango da. Horrez gainera, ikasleek ikasteko leku gehiago izango dute, ekipamendu honen berritze lanekin espazio gehiago irabazi dugulako helburu horretara zuzentzeko, lanak hasi aurretik ikasleek erabili ahal zituzten 174 plaza horiek baino gehiago baitira orain”. Argazkian, Getxoko Andra Mari kiroldegia obretan.
Kiroldegian zaharberritu eta hobetu egin diren gainontzeko guneei dagokienez, pilotalekuari emandako kolore urdina nabarmendu daiteke. Izan ere, Pilota Federazioak jokatzen denean hobeto ikusteko gomendatutako kolorea da hori. Ordutegiari dagokionez, ohikoa izaten jarraituko du. Hau da, egunero egongo da zabalik 8:30etik 21:30era bitartean, eta sartzeko ez da beharrezkoa Getxo Kiroletako bazkide izatea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun