Artisautzaz gozatzeko aukera egongo da asteburu honetan Areetan eta Itzubaltzetan
Maiatzaren 28tik 30era bitartean, Euskal Herriko artisautzaren topagunerik handienetakoa bilakatuko da Getxo udalerria. Aurten 27. urteurrena ospatuko du azokak, eta bertan 97 artisauk parte hartuko dute. Horietako 83 Areetako Xake plazan egongo dira euren lanak erakusten. Gainerako 14ak, berriz, Itzubaltzeta / Romoko Ibaiondo kalean kokatutako gastronomia gunean arituko dira. Sarrera doakoa izango da. Eta ordutegia 11:00etatik 14:00etara eta 17:00etatik 21:00etara (larunbatean, 21:30ak arte). Aurtengo azokan hainbat espezialitate erakutsiko dira: zeramika, bitxigintza, ehuna, harriak, metala, larrukigintza eta landare-zuntzaz eginiko lanak, besteak beste. Guztira, 22 izango dira azoka horretan ikusi ahal izango diren eskulangintza arloak. Argazkian, artisau bat lanean azokaren aurreko edizio batean / © Getxoko Kultur Etxea.
Getxoko Kultur Etxeak adierazi duenez, "eskulangintza azokan parte hartuko dutenak kontu handiz aukeratu dira eta, hori dela eta, azoka anitza lortu da. Euskal Herria osotik etorritako eskulangileez gain, Kataluniako, Aragoiko, Galiziako, Gaztela eta Leongo, Gaztela-Mantxako, Madrilgo, Errioxako, Asturiaseko, Valentziako, eta Andaluziako partaideak egongo dira". Aurten, gainera, Portugaletik eta Frantziatik etorritako hainbat artisauk ere parte hartuko dute azokan. Hortaz, ezagutzen dituen produktuez gain, hain ezagunak ez direnak eta eskulangintza beste era batera ulertzeko bidea ematen dutenak ere eskuratzeko aukera izango du jendeak. Beste alde batetik, lehiaketek ere bere txokoa izango dute azokan. Izan ere, eskulangileen lana eta produktuak aurkezteko modua sarituko dira. Ekimen horietan islatu egiten da urtez urte produktuen kalitatea eta euren postuen aurkezpena eta apaindura hobetzeko eskulangileek egiten duten ahalegina.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun