Bertan "inortxo ere ez zegoela" adierazi du Ladislao eta Prietoren etxean lanean ibili zen pintoreak
Defentsaren lekukoek deklaratu dute gaur 2008ko abenduan atxilotutako Uribe Kostako bost lagunei Espainiako Auzitegi Nazionalean egiten ari zaizkien epaiketan. Europa Press albiste agentzia espainolak nabarmendu duenez, Marimertxe Alcocerrek "biolentziaren aldeko aipamenik inoiz ez duela egin" adierazi dute auzipetuak euren senideei eskolak emandako edo bere lagunarteko kide diren hiru pertsonek. Bitartean, Ibai Egurrolak atzo esandakoa baieztatu dute beste bi lekukok. Aipatu dutenez, Asier Borrero ustezko ETAko kideari ihes egiten lagundu ei zion egunean, gazte algortarra eurekin egon zen goizetik gauera; "400 edo 500 lagun batu ziren" baba-jana antolatzen, alegia. Amets Ladislaorekin batera, Borrero euren etxean ezkutatzea leporatzen diote Maribel Prietori. Hala ere, denbora horretan aipatu etxebizitzan gizonik ez zutela ikusi deklaratu dute emakume berangoztarraren lagun bik. Bertan lanean ibili zen pintoreak ere "etxe guztian ibili arren, inortxo ere ez zegoela" adierazi du. Ladislaoren nagusiak, berriz, aipatu datetan neska abeltzaintza-saneamendurako kanpaina batean berarekin lanean ari zela esan du; baita hori frogatzeko agiriak aurkeztu ere. Argazkian, astelehenean prentsaurrekoa eman zuten bost auzipetuetatik lauk.
Bestalde, leporatzen zaizkien gertaeretan erabilitako ibilgailuak identifikatu omen zituzten Espainiako polizia nazional eta guardia zibil banak ere deklaratuko dute gaurkoan. Mugaren beste aldean Frantziako Segurtasun Indarrek egin zituzten atxiloketen lekuko ere izan zela adierazi du horietako batek, Europa Pressen arabera. Amets Ladislao eta Ibai Egurrola algortarrak 2008ko abenduaren 8an atxilotu zituen Irunen Guardia Zibilak, Algortakoa ere den Aitor Artetxe ustezko ETAko kideari ihes egiten lagundu izana egotzita. Azken hori egun berean atzeman zuten Gerben, Bagneres de Bigorre ondoan (Pirineo Garaiak). Ladislao eta Egurrolarekin batera, Javier Gutierrez "Guti" leioaztarra ere hartu zuten atxilo, “lanzadera” lanak egin izana leporatuta. Operazio horretan, Guardia Zibilak bi egun geroago atxilotu zituen Marimertxe Alcocer algortarra eta Maribel Prieto berangoztarra. Guardia Zibilaren eskuetan inkomunikaturik egon ziren egunetan "bortizki torturatuak" izan zirela salatu zuten bostek. Bestalde, "2008ko uztailetik azarora", Berangoko bien etxean, Asier Borrero ustezko ETAko kide algortarra ezkutatzea egozten diete Ladislao eta Prietori; baita Frantziara eramatea ere, Egurrola eta Alcocer "lanzadera" lanetan zebiltzala. Egun, guztiak kalean daude, 18.000 euroko fidantza ordainduta. Fiskalak 7 urteko espetxe zigorra eskatzen du Ladislaorentzat eta 5 urtekoa gainontzeko uribekostarrentzat. Guztiei ETAri laguntza ematea leporatzen die.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun