"Euskal Herria helmuga" dokumentala aurkeztuko dute bihar Plaza Beltza kulturgunean
Gizarte Ikerketarako Talde Eragilearekin (Gite-Ipes) elkarlanean, "Euskal Herria helmuga" dokumentala aurkeztuko dute bihar, hilak 27, Larrabasterrako Plaza Beltza kulturgunean (Akilino Arriola, 59). Hitzordua 19:30ean izango da. Bideoa Patrizia Muñozek zuzendutakoa da. Euskal Herrira bi une ezberdinetan heldutako migrazioa aurkezten du ikus-entzunezko lanak: alde batetik, 50eko eta 60ko hamarkadetan Espainiako estatuko hainbat lurraldeetatik industrian lan egitera etorritako lagunak. Eta bestaldetik, azken urteetan etorritakoak. Azken hauek mundu osotik heldu dira edozein lanetan jarduteko. Zuzendariak bi pertsona elkarrizketatu zituen migrazio bien artean dauden puntu komunak azaltzeko: Luz Amparo Pimiento "La posada de los abrazos" izeneko egitasmoaren asmatzaile eta partaidea eta Periko Solabarria langile, LABeko sindikalista eta HBko diputatu ohia. Amparo azken urteetako migrazioaz arituko da. Periko, berriz, 60ko hamarkadan jazotako migrazioaz. Argazkian, aurkezpen kartela.
Dokumentalean zehar, elkarrizketatuen hitzak Policarpo Fernandezek 1960ean grabatutako "Bilbao ignorado" filmaren irudiekin konbinatuko dira. Horrela, garaiko Bilboko ikuspegi berezia azalduko da, hiriko txabolekin besteak beste. Bideoa ikusi ostean, filmeko parte-hartzaileekin, Amparo eta Perikorekin, solasaldia egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun