Sopelako Udalak Metro Bilbao garraio enpresari eskatuko dio zerbitzuaren maiztasuna handitzea, etorkizunean Urdulizen eraikiko den eskualdeko ospitalea dela-eta. Eusko Alkartasunak aurkeztutako mozioa atzoko (maiatzak 27) osoko bilkuran onartu zuten. Eskualdeko ospitaleko kontsultetara joateko, Uribe Kostako zonaldera jende gehiago gerturatuko dela aurreikus daitekeela azaltzen du proposamenak. Zentzu horretan, Sopelako Udalbatzak beharrezko ikusten du aurreikuspen horiei aurre egitera eta garraiobideen azpiegitura hobetzea. Ordutegiak eta maiztasunaren handitzea Sopelako Udalaren aspaldiko eskaera da, tokiko iturriek aipatu dutenez. "Osoko bilkurak gaiari heldu dio berriz pisuzko arrazoi berri batekin. Azken batean, Metro Bilbaok Sopelan ematen duen zerbitzua hobetzeko beharra handituko da ospitalearen eskutik", gaineratu dutenez. Mozio hori onartzeaz gain, udal ordezkari sopeloztarrek garraio enpresaren bulego nagusietara elkarrekin joateko konpromisoa hartu dute, Sopelako talde politiko guztiek bertatik bertara eskaera helarazteko. Argazkia: © Metro Bilbao.
Eskutik doaz metroa eta Uribe Kosta ospitalea. Maiatzaren 17an, eskualdeko osasun zentro berriko lehen harria jartzeko ekitaldian, Patxi Lopezi berari eskatu zion Juan Olea Urdulizko alkateak aipatu udalerriko trenbide-pasagunea lurpera zezala, Araba, Bizkaia eta Gipuzkoako lehendakaria bertan zegoela aprobetxatuz. Lakuako exekutiboko buruak zehazki gai hori aipatu, baina zera erantzun zion Oleari: "bagabiltza bestelako arazoei irtenbideak bilatzen". Bi aste lehenago, hitzemandako hainbat proiektu "deuseztatzea edo hondatzea" egotzi zieten Eusko Jaurlaritzari eta Bizkaiko Garraio Partzuergoko PSE-EEren ordezkariei. Foru arduradunek adierazi zutenez, daukaten gehiengoa baliatuz, besteak beste, Urdulizen trenbidea lurperatzeko lanak egiteko diru partida kendu dute aurtengo aurrekontutik sozialistek. Pilar Ardanza Garraioa eta Hirigintza diputatuarekin batera agertu zen egun horretako prentsaurrekoan udal agintari urduliztarra. "Ospitalera heltzeko trenbidea lurperatzea aurreikusita zegoen. Zer gertatuko da orain larrialdi batera joandako anbulantziek Urdulizera heldu eta trenbide pasaguneko barrerak jaitsita aurkitzen badituzte?", tamaldu zuen Oleak. Bi aste beranduago, hilaren 17an, "Deia" egunkariari azaldu zionez, Eusko Jaurlaritzako Herri Lan eta Garraio Sailak trenbide azpitik jarri nahi omen du errepidea, pasonibela lurperatu beharrean. Atzo ei ziren biltzekoak erakunde baten zein bestearen ordezkariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun