Getxo udalerriko 275 familia ugariren artean 50.000 euro banatzea onartu du Udalak, hau da, iaz baino 32.000 euro gehiago. Laguntza jasoko duten familien kopurua ere handitu da, aurten iaz baino 75 familia gehiagok jasoko baitute dirua. Diru-laguntza jasoko dutenen profil ohikoena honakoa da: 18.001 eta 36.000 euroen arteko katastro-balioa dutenak. Guztira, 158 familia eta 28.440 euro batzen dira multzo horretan. Argazkian, Elena Coria zinegotzia eta Imanol Landa alkatea Getxoko Urduña kaleko 16 zenbakian zabaldutako Gizarte Zerbitzuen bulegoa aurkezten, 2010eko otsailaren 22an.
Diru kopuru horri gehitu behar zaio udal erakunde autonomo batzuek familia horiei egiten dizkieten hobariak eta zerbitzu batzuetan eskaintzen zaizkien bestelako murrizketak. Izan ere, Gobernu Taldeak "ardatz estrategikoen barruan kokatzen" ditu eta ardatz hori "elkartasunak sustatzen du, herritarrek dituzten kezkak eta beharrak asetze aldera". Diru-laguntzek familien kideek kultura, gizarte, ekonomia, kirol eta aisialdiko udal jardueretan parte hartzea dute helburu “senideek gizartearen kohesioan eta aurrerapenean duten balioa oso garrantzitsutzat jotzen baitugu. Horregatik, eta bere ahalmen ekonomikoaren arabera, familia hauei laguntza ekonomikoa eskaini nahi diegu”, nabarmendu du Elena Coria Gizarte Zerbitzuetako zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun