Espainiako Auzitegi Nazionalak joan den apirilaren 12an absoluzioa eman zuen "Egunkaria"-ko itxiera kasuan, bost auzipetuek ETArekin zerikusirik ez zutela izan argudiatuta. Tartean zen Xabier Oleaga Erandioko semea. Absoluzioa izan arren, 2003tik auzipetuek eta euskaltzaleek "inkisizioa" jasan dutela salatu dute liburuaren egileek. Auzi ekonomikoak zabalik jarraitzen du oraindik, eta zortzi auzipetu daude. Hala ere, ez dituzte Auzitegi Nazionalean epaituko, Gipuzkoan baizik.
Ikusi BerriaTBk zabaldutako bideoa:
"Egunkaria"-ren ibilbidea goretsi dute liburua kaleratuz EHUko hainbat irakaslek
"Euskaldunon Egunkaria"-ren ibilbidea goretsi dute gaur Txema Ramirez de la Piscina, Teresa Agirreazaldegi, Pedro Ibarra eta Ramon Zallo EHUko irakasleek. Bilbon aurkeztu dute eurek idatzitako "'Egunkaria'. Amets baten egia" liburua. "Kazeta modernoa izan zen, erreferentziazkoa, ondare hemerografikoa zen, langile talde kualifikatua zeukan, itxi zutenean merkatu kuota handia zuen –kontuan hartuta euskal hiztunen kopurua–, egoki hurbildu izan zen Euskal Herriko errealitate politiko-instituzional-sozial-informatibora, historia egin zuen euskal kazetaritzan, eta euskal kulturaren lekuko eta eragile izan zen", adierazi du Ramirez de la Piscinak hedabideen aurrean, Berria.info agerkari digitalak zabaldu duenez. Ttarttalo argitaletxeak plazaratu du "'Egunkaria'. Amets baten egia" liburua, euskaraz eta gazteleraz. 140 orrialde dauzka eta 12 euroko salneurria du. Aurkezpenean EHUko irakasleekin izan dira Joan Mari Torrealdai -itxierako kasuan libre atera zen, auzi ekonomikoan auzipetua dago- eta Felix Cañada abokatua. Argazkian, auziperatuei elkartasuna adierazteko elkarretaratzea Leioa eta Erandioko campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun