Metropoliko trena ustiatzen duen enpresak, horrela, bezeroen beharretara moldatuko du zerbitzua, "etengabe hobetzeko planak zentzua izango badu". "Une horietan, asteburuko zerbitzu etengabea ematen duen metro bakarra da Estatuan, eta 65 orduz jarraian irekita dagoen bakanetako bat munduan. 2009an soilik, hogeita lau orduko 79 jardunaldi programatu zituen metroak", nabarmendu dutenez.
Larunbat gauetako ordutegia eta maiztasunak
Ekainaren 4tik aurrera, ekain, uztail, abuztu eta iraileko asteburuetako gau guztietan, hamabost minututik behin ibiliko dira trenak Etxebarri-San Inazio enborrean eta ordu erditik ordu erdira Santurtziraino (2. linea) eta Plentziaraino (1. linea), bi noranzkoetan. "Ordutegi berriak uda heltzean jendearen ohiturak aldatzen direlako eta hiriko trenaren erabilerak etengabe gora egiten duelako jartzen dira. Metroak zeharkatzen dituen aisialdiko jardunak eta herri eta auzoetako jaiak ugaltzea erabakigarria da gaueko zerbitzua luzatzeko", azaldu dute metroko arduradunek.
Asteburu honetan, udako ostiraletako gaueko zerbitzuari ekingo dio Metro Bilbao garraio konpainiak. Enpresak dioenez, "10.000 pertsona inguruk hautatuko dute metroa ostiral gauetako joan-etorrietarako. Zerbitzu hori martxan jarriz ostiral gauetik igande goizera arteko garraio eskaria ase nahi dugu". Mugikortasun behar horrek goraka egin du azkeneko urteotan, "bereziki udako hilabeteetan". Metro Bilbaok kalkulatzen du ordutegi berri horrekin, gauero 6.250 ibilgailu gutxiago ibiliko direla errepideetatik, Eusko Jaurlaritzak erabiltzen duen 1,6 pertsona ibilgailu bakoitzeko okupazio ratioari adituz. Goizaldeko ordu bietatik 6:00etara 28 bidai erantsiz osatuko da ostiral gauetako zerbitzu hori. Ehun pertsona baino gehiagok lan egingo dute, gauero, ordutegi horiek bete daitezen; eta trenak eta instalazioak erabiltzeko baldintzarik egokienetan egon daitezen. Argazkian, metro geltoki bat bidaiariz gainezka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun