Guztira, zortzi izan dira aukeratuak, aurkeztutako 36 eskaeretatik. Hautaketa egiteko kontuan hartu dira prestakuntza eta enplegu programa arautzen duten oinarrien arabera lortutako puntuak, udal arduradunen arabera. Puntuazioa baremo sozio-ekonomikoan oinarritu da (langabezian egondako denbora, EINen modu jarraituan izena eman izana, etab.), lan-egoera ezegonkorrenean zeuden hautagaiak aukeratu ahal izateko. Tokiko erakundearen hitzetan, "ezbairik gabe, eskatzen ziren eskakizunak betetzen diren egiaztatu da". Honako hauek ziren eskakizunak: Urdulizko udalerrian erroldaturik egotea, gutxienez, 2007ko urtarrilaren 1etik; adinez nagusia izatea; eskaera aurkezteko epea (2009ko azaroa) bukatzean langabezian egotea; eta, azkenik, lan-egoera ezegonkorra edukitzea, xede horretarako ezarritako balorazioaren arabera.
Hautatutako lehenengo zortzi pertsonek, aurrerantzean, programaren fase biak beteko dituzte: lehenengoa, prestakuntza jasotzea izango da, euren enplegagarritasuna hobetzea ahalbidetuko diena. Bigarrena, berriz, Udalaren beraren lanak egitea izango da, sei hilabetez, gehienez ere. Hautatutakoen ezaugarriak direla-eta, laneko arriskuak prebenitzeko prestakuntza ikastaro bat diseinatu dute, etorkizunean lanean hasten direnean baliagarri izan dadin. Ikastaroa ekainaren 1ean ematen hasi zitzaien aukeratutako pertsonei. Ondoren, Udalari dagozkion lanak gauzatzen hasiko dira. Ekimen horren bitartez, kontratatutako pertsonek euren curriculuma hobetu eta laneko eskarmentua eskuratuko dute. "Finean, osagai soziala duen ekimena da, eta eragin zuzena du prestakuntza teorikoan nahiz praktikoan.", zehaztu dutenez.
Behar sozial bat
Udal agintarien hitzetan, "egungo egoera aintzat hartuta, beharrezkoa da Urdulizko herritarrek bizi duten egoera latza arindu dezaketen neurriak abiaraztea. Horretarako, gainera, beharrezkoa da etorkizunean lanean hasten direnean baliagarri izango zaizkien lanabesak eskaintzea". Horregatik, bada, tokiko erakundeak enplegu prestakuntzarako programa hau diseinatu zuen. "Programak udalerriko langabetuen ezaugarriak kontuan hartu ditu, eta, bereziki, krisiaren ondorioz egoera txarrenean daudenak hartu ditu aintzat", gaineratu dutenez. Gainera, 2010erako aurrekontuan, aurreko urtean erabili zuen partida bera (150.235 euro) jarri dute, urte honen bukaeran prestakuntza eta enplegu programa honen beste deialdi bat egiteko. "Horrek argi eta garbi erakusten du Juan Olea alkatea buru duen gobernu taldearen konpromisoa Urdulizko langabetuekiko", amaitu dutenez.
Urdulizko Udala iaz abiarazitako "Prestakuntza-Enplegu Programa 2009" garatzen ari da jada, Euskal Funtzio Publikoari buruzko Legearen 33.2. artikuluan aurreikusitakoari jarraiki. Horretara 150.253 euro bideratu zituen tokiko erakundeak. Egitasmoa betearazteko sortzen diren gastuak ordaintzeko erabiliko dute diru-kopuru hori, udal iturriek zehaztu dutenez. Urdulizko prestakuntza eta enplegu programa udalerriko langabetuen enplegagarritasuna hobetzeko helburuarekin sortu zen. "Izan ere, krisi ekonomikoa oso hedaturik dago eta langabezia tasak gehienezko maila historikoetara iritsi dira (%8,58, 2009ko hirugarren hiruhilekoa ixtean)", azaldu dutenez. Urdulizko Udala helburuok betetzen hasi da: langabezian zeuden udalerriko zortzi pertsona kontratatu ditu. Argazkian, herri lanak Urdulizen / © Urdulizko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun