"Gazteburue!" proiektuak irabazi du aurtengo Wanted ideia lehiaketa, Getxoko Gazteria Zerbitzuak bultzatutako 18 eta 30 urte arteko neska-mutilen proiektuak sustatzeko ekimena, alegia. Aurkeztutako lanaren helburua asteburu oso batean zehar hainbat musika ekitaldi egitea da, hala nola, Kabolamusik musika elkartearen aurkezpen jaialdia, rock kontzertua eta, azkenik, reggae jaialdi bat. Bigarren saria "Getxo KLIK" proiektuarentzat izan da. Horrek, gazteak zein nagusiak informazioaren eta komunikazioaren teknologien erabileran trebatzea du helburu. Guztira 15.000 euro banatu dituzte saritan, 8.900 euro lehenengoari eta 6.100 euro bigarrenari. Horrez gain, aholkularitza profesionalerako 10 ordu eman dizkiete. Argazkian, "Gazteburue!" proiektuaren sustatzaileak / © Getxoko Udala.
"Gazteburue!" proiektua sustatu duten gazteak Vanesa Manso, Nestor Gutierrez, Ricardo Perez, Ainara de la Torre, Ander Ormaetxea, Vicente Jauregi, Antxon Diaz, Carlos Rey Surman eta Iker del Pozo izan dira. Bigarren postuan geratutako lanean aritutakoak, berriz, Lara Trevilla, Paola Etxeita eta Susana Romero dira. Lehiaketara 8 proiektu aurkeztu ziren, eta Getxoko Gazteria Zerbitzuak aztertu eta beren ekarpenak egin zituen, proiektuak kokatzen diren alor desberdinetako profesionalek egindako txostenetan oinarrituta. Ekarpen horiek kontuan hartuta, talde sustatzaileek behin betiko proiektua prestatu zuten saria jaso ahal izateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun