Imanol Landa Getxoko alkateak Algortako udal erakustareto berria aurkeztu du gaur. “Udalerriko hirigunetik gertu eta gune estrategikoan kokatuta dagoen lokala da, Torrene kalean dago, hain zuzen, eta berton arte erakusketak edo beste motatakoak hartzeko dauden ekipamenduak osatzeko sortu da”, adierazi du Landak. Esparru hori egiteko 487.500 euro inbertitu dira, 2009rako Estatuko Gobernuaren E Planaren kontura. Erakustaretoaren kudeaketa Getxoko Kultur Etxearen eskuetan egongo da. Urtean 9 edo 10 erakusketa hartzea aurreikusi dute Udalekoek, bakoitza hilabeteko bataz besteko iraupenarekin. Datozen hilabeteetarako prestatuta dauden lehen ekimenak “Bosteko 2010” pintura erakusketa ibiltaria; “Getxo eta itsasoa” Rafa Aspiunzaren argazki erakusketa –Itsas Astearekin batera egingo dena–; “Getxophoto” eta Komiki Aretoa-INAEM izango dira. Aretoaren ordutegia, astelehenetik ostiralera, 11:00etatik 13:00ak arte eta 17:00etatik 20:00ak arte izango da. Larunbatetan, 12:00etatik 14:00ak arte eta 18:00etatik 21:00ak arte zabalduko dute. Eta igandetan, 12:00etatik 14:00ak arte. Argazkian, erakustokiaren aurkezpena gaur goizean / © Getxoko Udala.
Lokalak, guztira, 327,16 metro koadroko azalera erabilgarria du. Erakustaretoari dagokionez, 215 metro koadroko leku argia da eta bertan toki banatze bakarra egin da batzar areto bat ipintzeko. Komun egokitu bi ditu, eta garbiketa tresnak gordetzeko gela bat. Sotoan argindar, aire-girotze... instalazioak ipini dira. Halaber, aldamenean Hiri Antolamendurako Plan Orokorraren (HAPO) bulegoa aldi baterako ezartzeko gune bat gorde egin dute. Bertan herritarrek prozesu horri buruz eta horren garapenari buruz informazioa lortu ahal izango dute. Bulego horrek aparteko sarrera du, Torrene kaletik ere bai.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun