"Kirolari ateak zabalik" jaialdia egingo dute igandean Algortako Fadurako kiroldegian
Igande honetan, ekainaren 6an, Getxo Kirolak udal erakundeak Algortako Fadura kiroldegiko ateak zabalduko ditu, Bizkaiko Foru Aldundiak "Kirolari ateak zabalik" lelopean sustatutako kirol jai horretara hurbildu nahi duten pertsona guztientzat. Jardunaldia 10:30etik 14:30era izango da. Horretan, doako bi ekitaldi antolatu dituzte. Lehenengoa, aerobic ikasteko saioa izango da eta kiroldegiko 3. pilotalekuan egingo dute, 10:30etik 11:30era artean. Ondoren spinning saioa izango da 12:30etik 13:30era. "Kirolari ateak zabalik" jaia Bizkaiko 35 udalerritan egingo da. Alvaro Gonzalez zinegotziak gogoratu duenez, “kirola herritar guztien eskubidea ez ezik, integrazio, hezkuntza eta aisiarako alternatiba osasuntsua ere bihurtzeko helburuarekin, Europako Batasunak abiatutako programaren harira ospatuko da”. Argazkian, Fadura kiroldegia / © Getxoko Udala.
Beste alde batetik, Fadurako kanpoko igerilekuen ordutegia aldatuko dute ekainaren 12tik aurrera. Igerileku olinpikoa aste osoan zehar zabalduko dute 08:00etatik 21:30era. Gainontzeko guneak, berriz, 10:00etan zabalduko dituzte. Fitness-muskulazioko Fadura eta Gobelako gimnasioak ordutegi desberdina izango dute uztailean eta abuztuan. Astelehenetik ostiralera itxita egongo dira eguerditan, 14:00etatik 17:30era eta larunbatetan egun osoan. Azkenik, Fadurako osasun eta apaindegi zerbitzuari dagokionez, uztailean eta irailean zabalik egongo da astelehenetik ostiralera, 09:30etik 20:00etara. Abuztuan, berriz, itxita egongo da oporrak direla eta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun