Maiatzaren 17an, eskualdeko osasun zentro berriko lehen harria jartzeko ekitaldian, Patxi Lopezi berari eskatu zion Juan Olea Urdulizko alkateak aipatu udalerriko trenbide-pasagunea lurpera zezala, Araba, Bizkaia eta Gipuzkoako lehendakaria bertan zegoela aprobetxatuz. Lakuako exekutiboko buruak zehazki gai hori aipatu, baina zera erantzun zion Oleari: "bagabiltza bestelako arazoei irtenbideak bilatzen". Bi aste lehenago, hitzemandako hainbat proiektu "deuseztatzea edo hondatzea" egotzi zieten Eusko Jaurlaritzari eta Bizkaiko Garraio Partzuergoko PSE-EEren ordezkariei. Bizkaiko foru arduradunek adierazi zutenez, daukaten gehiengoa baliatuz, besteak beste, Urdulizen trenbidea lurperatzeko lanak egiteko diru partida kendu dute aurtengo aurrekontutik sozialistek. Pilar Ardanza Garraioa eta Hirigintza diputatuarekin batera agertu zen egun horretako prentsaurrekoan udal agintari urduliztarra. "Ospitalera heltzeko trenbidea lurperatzea aurreikusita zegoen. Zer gertatuko da orain larrialdi batera joandako anbulantziek Urdulizera heldu eta trenbide pasaguneko barrerak jaitsita aurkitzen badituzte?", tamaldu zuen Oleak. Bi aste beranduago, hilaren 17an, "Deia" egunkariari azaldu zionez, Eusko Jaurlaritzako Herri Lan eta Garraio Sailak trenbide azpitik jarri nahi omen du errepidea, pasonibela lurperatu beharrean. Baina, aukera horri "lardaskeria" deritzo Urdulizko alkateak.
"Ez dugu etsiko"
Bestalde, Ardanzak orain hilabete azaldu zuenez, trenbide-pasagunea lurperatzeaz gain, udalerriko inguru hori urbanizatzeko lanak egitea aurreikusten zuen 36 milioi eurotako proiektuak. Gainera, diru-kopuru horretatik, bai Aldundiak, bai Udalak, onartuta zeukaten ez ohiko gainkarga ekonomikoa bere gain hartzea, Bizkaiko Garraio Partzuergoari lanak finantzatzen lagundu ahal izateko. Bitartean, aukera bakarra trenbidea lurperatzea dela uste du Oleak. "Ez dutela etsiko" adierazi zuen atzo: "behar beste alditan hitz egingo dugu Jaurlaritzako ordezkariekin, proiektu hori behar-beharrezkoa delako herriarentzat".
Garraio arduradunekin izandako batzarra "etsigarritzat" jo du Urdulizko alkateak
"Etsigarria da. Obren erdia udalerriak ordaintzea nahi dute orain". Haserre, hitz horiekin laburbildu zuen atzo Juan Olea Urdulizko alkateak, Ernesto Gasco Eusko Jaurlaritzako Garraio sailburuordearekin izandako bilera, "Deia" egunkariak gaur zabaldu duenez. Trenbide-pasagunea lurperatzeko proiektua zergatik baztertu duten galdetzeko asmoz, tokiko agintariak berak eskatu zuen hitzordua. Oleak aitortu zuenez, "nahiko gogogabetuta atera gara batzarretik, hitzartuta zeuden lanei ekiteko inolako asmorik ez dutelako". Gascok erabilitako argudioak ekonomikoak ei dira. "Dirurik ez dagoela esan digute, Garraio Sailak bost milioi euro baino ez dituela obra horietarako. Eta, egin nahi badira, Udalak berak ordaindu beharko duela lanen kostuaren erdia", jaso du Olearen ahotik "Deia" egunkariak. Izan ere, proposamen hori "guzti bideraezina" eta "astakeria" dela uste du agintari urduliztarrak, "udalerriak ezin duelako ordaindu 36 milioi eurotan baloratutako egitasmoaren erdia". Alkateari lagunduz, atzo arratsaldean berarekin bildu ziren Urdulizko ordezkari jelkideen kexuei erantzunez, Aldundiaren kontaktuan jartzeko iradoki omen zion Oleari Gascok, foru erakundeak berak "dirua jar dezan". Argazkian, Juan Olea Patxi Lopezen atzean, Uribe Kosta ospitalearen lehen harria jartzeko ekitaldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun