Irakurleak eta, batez ere, irakurle taldeak izango dira Larrabetzun gaurtik igandera bitartean egingo den ekimenaren oinarrietako bat. Hala, irakurle taldeen arteko mahai-ingurua egingo dute bihar, 10:00etan. Euskal Herriko hamabi irakurle taldeetako kideek parte hartuko dute. Durango, Igorre, Iurreta, Markina, Santutxu, Basauri, Amezketa, Donostia, Legazpi, Larrabetzu, Zumarraga eta Meatzaldeko taldeetako ordezkariak izango dira. Eta dauzkaten kezkak, gogoetak eta etorkizunerako asmoak plazaratuko dituzte, Amaia Goikoetxea 111 Akademiako kideak azaldu duenez. Egitarauaren zati bat antolatzeko, 111 Akademiaren laguntza izan dute Literaturiakoek. Irakurle taldeen arteko topaketa antolatzeko, esate baterako. Iaz bezala, euskara hutsezko literatur liburuen azoka egingo dute, plazan. Eta argitaletxe nagusiek jarriko dituzte mahaiak: Alberdaniak, Elkarrek, Ereinek, Igelak, Maiatzek, Susak, Utriusque Vasconiaek eta Txalapartak. Halaber, liburu aurkezpenak eta literaturarekin zelanbaiteko lotura duten askotariko ekitaldiak izango dira Literaturian, gaur, bihar eta etzi.
Ikusi Literaturiak zabaldutako promozio bideoa:
Ostiral honetatik igandera bitartean, euskal literaturaren erdigune bilakatuko da Uribe Kosta eskualdetik gertu dagoen herri bat; Larrabetzu, alegia. Hango Literatura Eskolaren ekimenez Literaturia jaialdia egingo dute, bigarren urtez. Literatur azoka ez ezik, hainbat jardunaldi izango dira, denak euskaraz. Horrenbestez, gaur emango diete hasiera ekimenei. Harrera ekitaldia 20:00etan egingo dute. Horren ondotik, Edorta Jimenezek eta Rafa Ruedak "Haragizkoa" ikuskizuna eskainiko dute gaur, 21:00etan; eta Joseba Tapiak udazkenean kaleratuko duen diskoko abestiak emango ditu 22:00etan. Gainera, Literaturia dela-eta, ekainaren 5 eta 6rako herri-bazkariak prestatu dituzte. Bihar, Gurpide Larrabetzuko ekoizle eta kontsumitzaileen elkartekoen eskutik izango da oturuntza, 15:00etan. Sabelak bete ostean, bertso trama literarioa eskainiko dute Uxue Alberdi, Unai Iturriaga, Maialen Lujanbio eta Xabier Amuriza bertsolariek, Josu Goikoetxea gidaria dela. Igandeko bazkariari dagokionez, 15:00etan izango da, Txinpasmendi guraso elkarteak antolatuta. Txartelak Larrabetzuko tabernetan daude salgai (15 euro bazkari bakoitzak). Internet bidez erosteko aukera ere badago. Hala ere, larunbata baino lehen egiteko eskatu dute. Lortzen den diruaren zati handiena eskolako jantokirako izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun