Tokian tokian antolatutako autobusen bidez, Uribe Kosta eta Erandioko berbalagun ugari gerturatuko dira igande honetan, ekainak 6, Arrasatera, Mintza Egunaren bosgarren edizioaz gozatzeko. Besteak beste, eskualdeko 40 bat euskaltzale joango dira Egizu Getxo Euskaldun! elkarteak antolatutako garraioan. Arrasatera hurbiltzen direnek udalerri gipuzkoarreko txokoak eta historia hobeto ezagutzeko aukera izango dute, “baita mingainak dantzan jartzeko ere”, Topagunea Euskara Elkarteen Federazioak adierazi duenez. Jaialdia goizeko 11etan hasiko da, Biteri plazan egingo den ongietorriaz eta hamaiketakoaz. 12:00etan ibilaldi gidatua egingo dute bertaratutakoek, tokiko berezitasunak ezagutzeko, eta 13:30ean kalejiraren txanda izango da. Argazkian, 2008an Algortan eta Itzubaltzeta / Romon ospatu zuten Mintza Eguna. Argazki gehiago ikusteko sakatu hemen.
Eguerdi partean indarrak berritzeko unea izango da, eta horretarako Arrasate Errugbi taldeak Herriko plazan jarriko duen karpan bazkalduko dute 14:30etik aurrera. Esan beharra dago 300 pertsona inguru espero dutela, “halere bazkaltzeko 500 txartel ditugu, AED elkartean, Monte eta Irati tabernetan salgai daudenak”. 15:30ean une hunkigarria biziko da, sari banaketa burutuko baitute. Sari hauek urtero banatzen dira, Mintzapraktika egitasmoetan pertsona ezberdinek egin duten ibilbideak omentzeko. Arratsaldeko 16:00etan jaialdia bere azken txanpan sartuko da, Kataia taldeak erromeria eskainiko baitu. Esan beharra dago honako hau Mintza Egunaren berritasun nagusia izango dela, Markina eta Bergaran bizi eta euskaraz abesten duten senegaldar eta ganbiarrek osatzen baitute Kataia. 18:00ak aldera espero dute jaialdiari amaiera ematea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun