Usadio zaharrari eutsiz, aurten ere Gorpuzti eguna hartuko du igande honetan, bihar, Algortako Portu Zaharrak. Aurrekoetan bezala, meza atari zabalean entzuteko aukera izango dute Etxetxu plazara bertaratutakoek, eguerdiko 12etatik aurrera. Horren ostean, 13:00etan, ohiko sardina jana egongo da bertan eta, sabela bete bitartean, Biotz Alai abesbatza algortarraren emanaldia entzun ahal izango dute guztiek. Arratsaldean, berriz, Los Barbis taldeak izango du jaialdiari amaiera emateko ardura. Arratsaldeko 7etatik aurrera eskainiko dute saioa. Baina, ohiko jarduerez gain, aurten ontzi klasikoen agerraldia antolatu dute hainbat auzokidek. Goizeko 10etan jarri dute hitzordua Portu Zaharreko uretan, handik inguruetatik txangoa emateko. Sardina janarekin bat egin ostean, kirol portura abiatuko dira, bertan oroigarria eta freskagarriren bat hartzeko. Argibide gehiagorako, 660 312 073 telefonora jo daiteke. Argazkian, 2008ko Gorpuzti eguna Algortako Portu Zaharrean / © Algortako Portu Zaharra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun