Ikusi Sopela.net agerkari digitalak zabaldutako bideoa:
Imanol Landa Getxoko alkateak jarritako trabei aurre eginez, Uribe Kostako herri guztietako dozenaka auzokideek ekitaldi politikoa (mp3) eta herri bazkaria egin zituzten atzo Itzubaltzetako Romo ikastetxeko frontoian. Ezker abertzalearen, gazte independentisten zein Amnistiaren Aldeko Mugimenduaren izenean hainbat lagunek hartu zuten hitza. Guztiek "Zutik, Euskal Herria!" aldarrikapenaren baitan jasotzen den "aldaketa politikoa bizkortzeko hautuaren beharra" azpimarratu zuten. Tartean, atxilotze arriskuan dauden eskualdeko gazteak ere gogoratu zituzten; eta Uribe Kosta eta Erandioko euskal preso politikoei egin zieten gorazarre, aurreskua eskainiz. Ekitaldi politikoa Itzubaltzeta / Romo eta Areeta batzen diren Xake plaza zabalean egitekoak ziren, baina udal agintari jelkideak baimena ukatu zuen, "auzokideek plaza hori azken boladan asko erabiltzen dutela" argudiatuz. Horren ordez Romo ikastetxeko frontoira bidali zituen. Hori salatzeko, ekitaldia politikoa amaitu ostean Itzubaltzetako kaleetan zehar herri poteo egin da. Eguna amaitzeko 180 lagunek herri bazkaria izan zuten eta, kantuekin eta dantzekin, egunari amaiera eman zitzaion, "aurrean dauden erronka politikoak egi bihurtzeko guztion inplikazioa erabat beharrezkoa" dela azpimarratu zutelarik. Argazkian, ekitaldian bildutako uribekostarrak "Eusko gudariak" abesten. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun