Antolatzaileen ongi etorriaren ondoren, bertaratutako lagunek hamaiketakoa egin zuten Biteri plazan, txalapartaren soinuak lagunduta. Euriak une batetik bestera denak sakabanatu behar zituela ematen zuen arren, azkenean eguraldiak ere bat egin zuen jaiarekin, eta han-hemenkako tantatxo batzuk kenduta, aparteko eragozpenik ez zen egon. Hamaiketakoaren ondoren Arrasateko historia eta txoko esanguratsuak ezagutzeko ibilbide gidatua hasi zen, Ana Isabel Ugalderen eskutik. Historialariak ahozabalik utzi zuen bat baino gehiago Arrasate eta Mondragoeren arteko diferentziak, herriko harresia eta garai bateko arkitektura eta hirigintza arauak gaitzat hartuta.
Ibilbidearen ostean, Manex Agurre eta Jokin Labaien bertsolari gazteek jarri zioten piperra goizari, eta jaso zuten txalo zaparrada ikusita, entzuleek gustura hartu zituztela esan daiteke. Gero entzuleak beraiek izan ziren protagonista, Portaloiko kanta taldeak eta Arrasateko trikitilariek kantuan eta dantzan jarri baitzituzten, hala Mintza Egunera joandakoak nola kalean zebiltzan herritarrak ere. Kalejiraren ondoren, 14:30ak aldera, mintzalagunak Udaletxeko plazako karpa erraldoian elkartu ziren elkarrekin bazkaltzeko.
Sorpresak
270 lagun batu ziren han guztira, eta, postrean, eguneko unerik hunkigarriena iritsi zen: urtero egiten den sari banaketarena, hain zuzen ere. "Sari horiekin, mintzapraktika egitasmoetan ibilbide nabarmena duten lagunen ahalegina eskertzen da. Eta bistan da asko direla ahalegin hori egiten dutenak", Topagunetik nabarmendu duetenez. Izan ere, aurten zazpi izan dira saritutakoak: Uribe Kostako Ana Telo, Bergarako Nerea Altzelai, Arrasateko Mari Karmen Agilar eta Espe Sainz, Ezkerraldeko Juanan Fernandez eta Mikel Ferrero eta duela 21 urte Ekuadorretik Donostiara etorritako Gladis Villalva kazetaria.
Guztiek ere hunkituta jaso zuten saria, eta eskerrak eman ondoren erromeriaren txanda izan zen. Seguruenik, horixe izan zen eguneko sorpresarik handiena askorentzat: izan ere, musikari senegaldarrek eta ganbiarrek osatzen duten Kataia taldeak izan zuen musika jartzeko lana: taldeak musikarien herriko musika egiten du, euskarazko letra jarrita, nahasketa bitxia sortuz. Hasierako ezustekoa gaindituta, asko izan ziren Kataiaren erritmoekin dantzara animatu ziren berbalagunak zein kaleko herritarrak, eta halaxe, kantuan eta dantzan joan zen arratsaldea, dezente luzatu zena. Bosgarrena ia-ia amaitu gabe oraindik, eta partaideetako asko galdezka hasi ziren jadanik, seigarrena non eta noiz izango den.
Hamaiketan zuten hitzordua, eta puntual-puntual agertu ziren: 300 bat lagun bildu ziren atzo Arrasaten Mintza Egunaren bosgarren edizioa ospatzeko. Tokian tokian antolatutako autobusen bidez, Uribe Kosta eta Erandioko berbalagun ugari gerturatu ziren udalerri gipuzkoarrera. Besteak beste, eskualdeko 40 bat euskaltzale joan ziren Egizu Getxo Euskaldun! elkarteak jarritako garraioan. Topagunea Euskara Elkarteen Federazioak, AED Elkarteak eta Zahar Berri mintzapraktika egitasmoak prestatu zuten Euskal Herriko mintzapraktika egitasmoetako partaideak elkartzeko eta jai-egun entretenigarria euskaraz pasatzeko helburua duen jaia. Berbalagunak, solaskideak, mintzalagunak... Hego Euskal Herriko txoko guztietatik hurbildu ziren Arrasatera mingaina gustura astintzeko. Argazkian, besteak beste, Uribe Kostako Ana Telo berbalagunari eman zioten saria atzoko Mintza Egunean / cc-by-nc-sa Topagunea. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun