Getxoko Udaltzaingoak gazte bat atxilotu du Algortan taberna batean lapurtzen saiatzea egotzita

Algortan bizi den 25 urteko mutil bat atxilotu zuen atzo goizaldean Getxoko Udaltzaingoak, Sarrikobaso kale algortarreko taberna batean lapurtzen saiatu zelakoan. Goizeko seiak aldera egindako dei baten bidez ohartarazi zieten tokiko poliziei, aipatutako tabernaren kristalak apurtzen zebilen gizon bat zegoela. Harrezkero, patruila bat tokira bertaratu eta aizto bat zeraman gazte bat topatu zuen. Udal iturriek adierazi dutenez, "gazteak eskuetan hainbat ebaki zituen eta jantziak odolez zikinduta". Udaltzainen arabera, "mutilak kristal batzuk apurtu zituen baina ez zuen tabernara sartzea lortu". Ondorioz, poliziek gizonezkoa atxilotu zuten, tabernan lapurtzen saiatzea egotzita. DYAko anbulantzia batean sendatu ostean, epailearen esku utzi zuten gaztea.