Ostirala izango da jaialdiko egunik garrantzitsuena. Egun horretan, zaletuek bi ekitaldiz gozatzeko aukera izango dute. 2004ko ekitaldi arrakastatsuaren ostean, berriro etorriko da Getxora Eric Sardinas dobroren (gitarra resofonikoa) maisu handia, blues estiloko gitarra jolerik bikainenetakoa. "Treta Me Right" (1999) eta "Devil's Train" ditu bere lehenengo bi lanak. Antolatzaileen arabera, "horietan bietan argi geratu zen bluesa lantzeko estilo berri harrigarri bezain indartsua: erreala, gordina eta biziki basatia". "Eric Sardinas & Big Motor" da bere azken lana. Bertan, orain arteko bideari ekiten dio, betiere, bluesaren inguruko aurreiritziak hautsi nahian, eta harago joan nahian, etorkizunean aukera anitzeko agertokia proposatuz. Kontzertu horretan, gainera, gonbidatu bat izango du: Raimundo Amador flamenko musikako gitarra jolerik aipagarrienetakoa, bere musika "bestelako estilo ugarirekin fusionatzeko gai dena, hala nola, rock musika edota bluesa".
Betty LaVette
Hurrengo egunean, larunbatean, jaialdiak Soul musikako ahotsik handienetako bati emango dio ongi etorria: Betty LaVette. 2008ko Grammy sarietan izendapena jaso zuen "The Scene of Crime" lanarengatik, eta 2004 eta 2008an, berriz, Blues Music Award delakoa eskuratu. Egun horretako proposamena osatzeko, Biotz Alai plazako kontzertua bukatzen denean, The Piper's taberna irlandarrak hartuko du lekukoa. Modu horretan, blues gauak jarraipena izango du, Blues de Luxe talde bilbotarraren eskutik.
Music Maker Foundation
Azkenik, jaialdiaren azken ekitaldia hilaren 20an izango da, igandean, proiektu bitxi baten eskutik: Music Maker Foundation. Ekimen honen helburua bikoitza da: "blues musikaren tradizioa eta benetakotasuna berreskuratzea" alde batetik, eta bluesmen beterano askorentzako "egoitza artistiko" bilakatzea, bestetik. "Ikuskizun honen bidez benetako blues kluben giroa bizi ahalko dugu", adierazi dute Getxo Kultur Etxekoek. Artista beteranoak igoko dira eszenario gainera, oinarri erritmiko bikain baten laguntzarekin. Blues Maker Foundation ekimenak izen handiko artistak bildu araziko ditu Getxon: Dr. Burt, Pat Cohen, Eddie Tigner, Beverly Watkins, Tommy Brown edota Lil' Joe, blues musika onenaren inguruan betiere.
Udarekin batera, Getxo&Blues jaialdia helduko da. Aurtengo edizioa hogeita bigarrena izango da eta ekainaren 18tik 20ra arte ospatuko da. Aurten, obrak direla eta, kontzertu guztiak Algortako Biotz Alai plazan izango dira, hilaren 19ko "jam session" delakoa izan ezik, Algortako The Piper's taberna irlandarrean egingo baita. Antolatzaileek adierazi dutenez, "azken 22 urteotan Getxoko Nazioarteko Blues Jaialdiak etengabe erakutsi die ikusleei zeinen aberatsa den musika hori. Gauzak horrela, dagokion garrantzia aintzatetsi dio bluesari, behin eta berriz. Bluesa da Getxoko jaialdiko protagonista bakarra, eta hiru egunez eskaintzen dio entzuleari erro afro-amerikarreko musika horrek duen aniztasuna". Argazkian, aurten ere Eric Sardinas maisua izango da Getxo&Blues jaialdian / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun