Herrizaingo Sailak zabaldutakoaren aranera, joan den asteburuan, "diru tindatuaren" maula erabiliz Urdulizen egitekotan ziren iruzur kasu baten berri izan zuen Ertzaintzak. Bertan, auto bat salgai zuen gizonezko batekin harremanetan jarri ziren beste gizon bi. Ibilgailua erosteko aipatutako iruzurra erabiltzera zihoazen bi susmagarriak. Polizia iturriek azaldu dutenez, biktimei esaten zieten beren jatorrizko herrialdetik (kamerundarrak ziren) diru kopuru handiak ezkutuan atera behar izan zituztela eta mugako aireportuan dirua kendu ez ziezaioten, billeteak tindatu egin behar izan zituztela. Azkenik, tindatutako paper horiek legezko diru bilakatuko zituztela azaltzen zieten; likido berezi batzuek eragingo zuten prozesu kimiko bati esker tindatuta zeuden paper horiek legezko diru bilakatuko zituztela ziurtatzen zieten iruzurgileek.
Hainbat saiaketa
Atzo goizean, iruzurraren ustezko egileak autoaren saltzailearekin biltzekoak ziren Urdulizen. Hitzorduan, tindatutako billete horiek diru nola bilakatzen zituzten erakutsiko omen zioten. Biktima ez zen entzundakoaz fidatu eta Ertzaintzari eman zion guzti honen berri. Agenteak hitzordura joan ziren eta bertan atxilotu zituzten ustezko bi iruzurgileak. Maula mota hori egiteko hainbat produktu aurkitu zizkieten. Horrez gain, maiatzean Getxon jazotako beste maula baten egileak bi susmagarriak izan zirela baieztatu ahal izan zuten ertzainek. Kasu hartan, 7.000 euroko iruzurra egin zioten lokal bat eskualdatu nahi izan zuen Areetako saltzaile bati. Halaber, ikerketek argitu dute, atxiloketa hauei esker hirugarren maula bat galarazi duela Ertzaintzak. Getxon egitekotan ziren eta autoak konpontzeko enpresa bat salgai zuen enpresari bat izango zen biktima berria.
Bi gizon atxilotu dituzte Urdulizen "diru tindatuaren" maula egiten saiatzea egotzita
2010ko eka. 8a, 18:42
Ertzaintzak bi gizonezko atxilotu zituen atzo Urdulizen, iruzur delitu bat leporatuta. Bizkaiko udalerri ezberdinetan ustez "billete tindatuen" iruzurra egin izana egozten diete bi atxilotuei, Eusko Jaurlaritzako Herrizaingo Sailak gaur jakinarazi duenez. Kasu guztietan, biktimek ondasunen bat (lokalak eta ibilgailuak, batez ere) saltzeko edo negozioren bat eskuz aldatzeko iragarkiak jarriak zituzten internet bidez edo hedabide idatzietan. Horrela, iruzurgileek Areetako saltzaile bati egin zioten maula eta bere autoa saldu nahi zuen Urdulizko gizonezko bati gauza bera egiten saiatu ziren, polizia iturrien arabera. Egin berri diren atxiloketei esker, autoak konpontzeko enpresa bat salgai jarri zuen Getxoko enpresari bati iruzur egin ziezaioten ere galarazi omen du Ertzaintzak.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun