Joan den astean iragarritako kanpainari jarraiki, eskualdean sortutako hiru lan-eskaintzen berri eman du Plentziako ezker abertzaleak. Besteak beste, Gorlizen tabernari bila dabiltzala jakinarazi dute. Ondokoa da kontakturako telefono zenbakia: 648 925 527. Bestalde, Uribe Kostako Behargintzak zabaldutako beste bi eskaintza jarri dituzte independentista plentziarrek euren bitakoran: batetik, sukaldari bila dabiltza Gorlizko jatetxe batean; eta bestetik, neskamea behar dute Urdulizko etxe batean. Informazio gehiago lortzeko, Behargintzara jo beharko dute interesatutako langabetuek, 946 760 638 telefono zenbakira deituz, edo bestela, Berangoko Karabiazpi kaleko 1. zenbakian dauzkaten bulegoetara hurbilduz. Mezua bidaltzea ere badago, ondoko e-posta helbidera: urkobe[abildua]urkobe.net. Argazkian, egunotan itsas-hiribilduko Udalaren jarrera salatzen dabil Plentzia eta Gorlizko Langabetuen Asanbladak / © Piztu Plentzia!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun