Imanol Landa Getxoko alkateak Carlos Epalza UNICEF Euskadi elkarteko presidenteari eman dio gaur goizean Bigarren Eskuko Liburu Azoka Solidarioan bildutako 12.733 euroko txekea, aurreko edizioan baino %13 gehiago. Oraingoan, Haitira bidaliko du dirua gobernuz kanpoko erakundeak, herrialde horretan, osasun, elikadura, ur eta saneamendu, haurren babesa eta hezkuntza alorretan aurrera eramaten ari diren hainbat proiektutarako. Azoka joan den maiatzaren 13tik 16ra ospatu zen Algortako Telletxe plazan. Ikusgai eta salgai jarri ziren 15.500 ale. Horietatik %85a saldu zen euro bateko prezio sinbolikoan. Guztira, bertatik 16.000 lagun pasa zirela jakinarazi dute Udalekoek. Argazkian, Imanol Landa eta Carlos Epalza 12.733 euroko txekearekin.
Alkatea oso pozik agertu da emaitza horiekin eta ekimen borobila delakoan dago, “Udalak bitartekari lana egiten duelako, lehenengoz herritarrek emandako liburuak jaso eta ondoren horien salmentatik ateratzen duen dirua garapeneko proiektu baterako zuzentzen duelako. Oraingoan, gainera, Haitira berriro laguntza mezua bidaltzeko lagunduko du”. Amaitzeko, Imanol Landaren arabera, “beste behin ere Getxok herri solidarioa dela utzi du agerian". Bestalde, Carlos Epalzak eskerrak eman dizkie bai Udalari bere laguntzagatik, bai herritarrei beren esfortzuagatik. GKE horrek Haitin 1949az geroztik aurrera eramaten ari den hainbat proiektutan bideratuko du. “Diru kopuru horrek, beste udal eta erakunde batzuek emandakoarekin batera, lurrikara batek urtarrilean isolatutako herrialde horretara zuzendutako laguntza areagotzeko balio izango du; batez ere, haurren elikadura eta heziketarako, ur eta saneamendurako eta haurren babeserako”, azaldu du UNICEF Euskadiko presidenteak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun