Sopelan gaztetxea izatea aldizkako gertaera izan da azken hamarkadan. Hor daude gazte eta ez hain gazteen burmuinean gutxienez Gaztetxe Zaharra, Eskola Gorriak, Igeltsera eta Ganebarri gaztetxeetako bizipenak eta desalojoen minak. 2009n zehar, Udalaren bitartez gazteentzako gune autogestionatu bat legez sortzeko hainbat proposamen, batzar eta proiektu bideratu ostean, urte bukaeran bide horrekin etsituta agertu zen Gazte Asanblada Sopeloztarra: "erantzunik eta irtenbiderik gabe, esku hutsik itzuli izan gara beti", azaldu zuen orduan gazte erakundeak.
Kontratu bidezko gune autogestionatua
Hori dela eta, eta saiakera antzu batzuen ostean, Lizarre auzoko Sekeko antzinako errota eta ondoko korta okupatu zituzten 2009ko abenduaren 19an, "gune sortzaile eta autogestionatua" bilakatzeko asmoz. Handik aurrera, "lan ta lan ibili gara teilatua, paretak, lurra eta abar luze bat konpontzen", gazteek gogoratu dutenez. Bidea errazteko lanak ere egin zituzten inguruan, errekako pareko baranda konpontzea kasu. Edozelan ere, Aratusteak ospatzeko astia ere topatu zuten nonbaiten, baita bisitan joan zaizkien auzokideei arreta egitekoa ere. Azkenik, erorita zegoen eraikineko legezko jabeekin lagunarteko konponbidea bilatzen saiatu ziren hasieratik eta pasa den apirilean saria izan zuen ahalegin horrek. Hiru urteko kontratua sinatu zuten orduan errotako ugazabekin eta ordutik hona "legalki" erabiltzen dute aipatu eraikina.
Sekeko gaztetxea larunbat honetan, hilak 12, estreinatuko du ofizialki Gazte Asanblada Sopeloztarrak, zazpi hilabetez auzolanetan murgilduta egon ondoren. Izan ere, GASek berak zabaldu duenez, "guztiok espero genuen eguna heldu da! Egindako lan eta ahalegin guztia saritua ikusteko eguna". Lizarre auzoko gune autogestionatuaren aurkezpena 18:30etan izango da. Ekitaldiaren ostean, Virgen a los 19 izeneko kantautoreak joko du. 20:30ak aldera, berriz, kalejira-poteo musikatua egingo dute herritik Batukada Taldearekin. Baina herrira abiatu aurretik izango da zer ikusi, zer entzun eta zertaz gozatu, burututako hainbat ekimenei eta Sekekok bizi duen aldaketari buruzko argazki erakusketa, musika eta lunch-a direla medio. Gazteek Sekeko ezagutzera "eta nola ez, bertan parte hartzera" gonbidatu dituzte Sopelako eta inguruetako auzokide guztiak eta bereziki gazteak. Argazkian, gaztetxea elurrak hartuta, pasa den urtarrilean / © GAS.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun