Atzo prentsaurrekoa eskaini zuen euskal gehiengo sindikalak, larunbat honetan, ekainak 12, izango den manifestazioan parte hartzearen garrantzia azpimarratuz. Hitzordua 17:30ean jarri dute, Bilboko Bihotz Sakratutik abiatuta, "Murrizketarik ez! Euskal langileok gure etorkizunaren jabe!" lemapean. ELA, LAB, ESK, EILAS, EHNE eta HIRU sindikatuen hitzetan, Espainiar estatuak krisiaren aurrean jarri nahi dituen neurriei aurre egin behar zaie, "denak langileon kaltetan eta patronalaren mesedetan eginak" baitaude: "batetik sektore publikoa murriztu nahi dute merkatu pribatuaren mesedetan, eta beraz, merkatuaren jabe direnen mesedetan. Eta bestetik, langileon eskubide sozial eta laboralak murriztu nahi dituzte, langileriak eskubide gutxiago izateak patronalak botere gehiago eskuratzea suposatzen duela jakinik", azaldu zutenez. Bestalde, Espainia mailako sindikatuak izan zituen aipagai Adolfo Muñoz “Txiki” ELAko idazkari nagusiak: “UGT eta CCOO sindikatuak gobernuaren laguntzaile gisa ari dira jokatzen eta benetan penagarria da hauen jarrera. Elkarrizketa soziala aldarrikatzea une honetan lotsagarria da”, salatu zuen. Argazkian, Getxoko udaletxe aurrean egin zuten elkarretaratzea maiatzaren 25eko greba egunean eskualdeko funtzionarioek.
Honekin batera langileok politikak aldatzea behar dugula adierazi zuten sindikatuetako ordezkariek, horretarako "hori ziurtatuko duen marko berria ezinbesteko dugula" aipatu zutelarik. "Partidu politikoei dei egiten diegu langileon egoeraren aurrean konpromisoak bereganatu ditzaten, iniziatiba har dezaten langileon eskubideak ziurtatuko dituzten politikak bultzatzeko, politika horiek hemen finkatu eta erabaki daitezen markoa bultzatzeko", adierazi zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun