Alkateak aipatu duenez, "mendeurrena ospatzeko une aproposa da, errepikaezina den heinean, bidean gelditzeko eta atzera begiratzeko. Egindako ibilbideari errepasoa egiteaz gain, XX. mendearen hasieran sortzen ari zen gizarte berrian eliza gauzatzea posible egin zutenak, hala nola, ehun urte hauetan, gaur arte, komunitatearen zerbitzu-bokazioa bizirik mantendu duten erlijiosoak gogoratzeko balioko du”. Mendeurren hori ospatzeko, hainbat ekintza antolatu dituzte. Gaurtik uztailaren 16ra bitartean, Eusko Jaurlaritzak interesezko ondare izendatu duen Karmen elizaren mendeurrenari buruzko erakusketa izango da tokian bertan. Besteak beste, koadroak, argazkiak eta jatorrizko dokumentuak egongo dira ikusgai, eliza eraikitzen hasi zirenetik Iruñeko apezpikuak 1910ko apirilaren 10ean inauguratu zuen arteko bilakaera erakusteko asmoz. Mostra, astegunetan, 10:30etik 12:00etara eta 18:30etik 20:00etara bisitatu ahal izango da. Igandetan, berriz, 19:00etatik 20:00ak arte.
Liburua eta meza
Halaber, “El Carmen de Neguri: cien años para recordar” izeneko liburua argitaratu dute, Cesareo Miguelez parrokoak berak idatzia. Apaiza urte betez ibili da elizako artxibategian ikertzen, hala nola, erlijio-komunitateko hainbat laguntzaileekin datuak eta dokumentazioa biltzen. 1.500 ale kaleratu dituzte eta astelehenetik, hilaren 14tik aurrera, 8 eurotan egongo dira salgai elizako lokaletan. Ospakizun ekitaldiak uztailaren 16an, Karmengo Ama Birjinaren Egunean, bukatuko dira 12:00etan egingo den meza nagusiarekin. Bertan eliz eta udal agintariak eta Algortako Biotz Alai abesbatza egongo dira.
Imanol Landa Getxoko alkateak eta Cesareo Miguelez Neguriko Karmengo Amaren elizako parrokoak gaur aurkeztu dituzte aipatu eraikinaren mendeurrena ospatzeko ekitaldiak. Besteak beste, liburu bat argitaratu dute; eta erakusketa zein elizkizun bana izango dira. Landak adierazi duenez, "Karmengo Amaren eliza joan den mendearen hasierako Neguri auzoaren garapenaren lekuko eta protagonista bihurtu da. Baina, batez ere, auzoko hainbat belaunaldiek, euren bizitzetan azpimarragarriak eta garrantzitsuak izan diren momentuetan berton topalekua eta erlijio arretarako erreferentzi-lekua izan dute. Udalean oso harro sentitzen gara, antolatzaileekin batera, mendeurrena ospatzeko prestatu diren ekitaldietan parte hartu ahal izateagatik”. Getxoko Udalak 9.000 euro eman ditu Neguriko parrokiaren mendeurrena ospatzeko egingo diren hainbat ekitaldietarako. Horietatik 6.000 euro fatxadan zein barrualdean egindako pintura lanen zati bat ordaintzeko izango dira eta 3.000 euro Cesareo Miguelezek idatzitako “El Carmen de Neguri: cien años para recordar” liburua argitaratzen laguntzeko. Argazkian, Imanol Landa eta Cesareo Miguelez gaurko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun