URAk Aldundiaren aipatu neurriak ez betetzeak “lanak hilabete batzuez atzeratzearen benetako arriskua dakar, eta hori auzotarren lasaitasunaren kalterako da; arrisku hori, oraintxe bertan, bakarrik konpon daiteke URAk Aldundiaren aurrean Gobelako zubietan eta ibaiertzetan, pertsonentzat uholdeen arriskua saihestu aldera, lanekin jarraitzeko beharra justifikatzen badu”, azpimarratu du Landak (mp3).
Getxoko alkateak esan duenez (mp3) "jakin badakigu aurreratutako lan hauek egitea oso zaila dela ikuspegi tekniko eta legaletik eta, hartara, gorabehera eta arazo zenbait sor litekeela, baina pazientziak ere baduela bere muga". Zentzu honetan, Landak gogoratu du, alkate gisara, aurreratutako lanak egin zitezen Udalari eskatutako konpromiso guztiak bete dituela. "Gogoratzea besterik ez dago Uholdeetako Batzorde Berezian egindako lan tekniko eta politiko nekeza. Horren emaitza izan zen Uraren proiektu nagusia Udalbatzan aho batez onartu izana, halaxe eskatu baitzigun erakunde horrek, eta horrekin batera, erakunde horren eskuetan utzi genituela lanak egiteko beharrezkoak ziren lursail publiko eta pribatuak, azken hauek desjabetu eta gero".
Pasa den maiatzaren 26an Ignacio Atxukarro Eusko Jaurlaritzako Lurralde Plangintzako eta Uren sailburuordearekin batzartu zen Imanol Landa, Gobela ibaiko lanak zirela eta. Zapore gazi-gozoz atera zen bilera horretatik Getxoko mandataria: "konfiantzarekin itxarongo dugu, Gobela ibaiaren proiektu orokorrari Eusko Jaurlaritzak ematen dion lehentasunaz zalantza guztiak argitu ez ditugun arren". Are gehiago, sailburuak "ez dagoela inolako arrazoirik proiektua moteltzeko, eta are gutxiago, gelditzeko" esan ziola errepikatu zuen Landak.
Jaurlaritzaren menpeko Ura agentziak arrain hiru-arantza babesteko neurri zuzentzaileak bete ez dituelakoan, Foru Aldundiak Gobela ibaiko ibilgu eta ertzetako lanak geldiarazteko erabakia hartu berri du. Hori dela eta, bat-bateko agerraldia egin du gaur goizean Imanol Landa Getxoko alkateak. Argi baino argiago mintzatu da: “hiru urte daramagu ditxosozko lan hauekin bueltaka eta aspertuta gaude daborduko txitean-pitean oztopo berriak sortzen baitira. Eskatzen dugun gauza bakarra da instituzio bakoitzak bere konpromiso eta betebeharrak bete ditzan eta obra behin betiko amai dadin guztion lasaitasunerako”. Hori lortzeko da Gobernu taldeak emandako hitza eta horretarako ari da lanean URArekin eta Foru Aldundiarekin. Argazkian, auzokideen mobilizazio bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun