Fermin Martinez, Zuriñe Gojenola eta Artzain Santesteban gazte independentistak atxilotu egin ditu gaur Italiako Poliziak Erroman. Espainiako Poliziak azaroan gazte independentisten aurka egindako operaziotik ihes egindako hiru lagunek hedabideen aurrean agerraldia egitekoak ziren Erroman 13:00etan, Legebiltzarraren aurrean, euren egoera azaltzeko eta gatazkaren irtenbide politikoa aldarrikatzeko, Amnistiaren Aldeko Mugimenduak baieztatu duenez. Hara bidean zirela atzeman ditu Poliziak. Hain zuzen, Jose Luis Rodriguez Zapatero Espainiako gobernuburua Erroman dago gaur, eta Silvio Berlusconi Italiako lehen ministroarekin bildu da 13:00etan. Bitartean, Ion Telleria (Idiazabal, 28 urte) libre utzi du gaur Paueko (Okzitania, Frantzia) epaileak, baina astearterako hitzordua jarri dio, euroagindu saioa egiteko. Fernando Grande Marlaska Espainiako Auzitegi Nazionaleko epaileak hura Espainiaratzeko eskaera egina du, Segiko kidea dela egotzita. Telleria atzo atxilotu zuen, Lapurdin, Frantziako Poliziak. Azken hilabeteotan bizi da Urruñan, eta "bizitza publikoa" egiten du, AAMk dioenez. Info7 irratiko kazetaria da. Argazkian, maiatzaren 21ean Algortan egindako antzerki-parodia.
2009ko azaroko polizia operazioa ere Grande Marlaskak agindu zuen. 34 gazte atxilotu zituzten, Segiko kideak direlakoan. Hilabete beranduago Xabier de la Maza mutil goliztarra ere atzeman zuten. "Inkomunikazio aldiko galdeketetan jasandako torturen bidez, bere buruaren kontrako erruztapenak egiteaz gain, Uribe Kosta eta Erandioko 10 gazteren aurkako erruztatzeak sinarazi zizkioten. Ondorioz, eskualdeko 10 neska-mutilen izenez osatutako zerrenda beltza egin zuen Poliziak. Edozein unetan, egoera politikoak hala eskatzen duenean, horiek ere atxilotuak, torturatuak eta espetxeratuak izateko arrisku bizian aurkitzen dira", Uribe Kostako AAMk behin baino gehiagotan salatu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun