Anton Fernandezentzat "egia, justizia eta ordaina" eskatuko dute bihar Erandion
Anton Fernandez erandioztarra eta haren senideentzat zein Francoren erregimenaren biktima guztientzat "egia, justizia eta ordaina" eskatzeko asmoz, ostiral honetarako, ekainak 11, Erandioko metro geltokiko zabalgunean deitu du elkarretaratzea Ahaztuak 1936-1977 elkarteak. Hitzordua 20:00etan jarri dute. Kutsaduraren kontrako manifestazioen harira, 1969ko urriaren 28ko gauean, Erandioko auzokideak protestan atera ziren. Polizia armatuak tiroka agertu ziren eta Anton Fernandez buruan zauritu zuten, leihotik begira zegoela. Hurrengo eguneko mobilizazioan Josu Murueta gaztea tiroz hil zuten. Fernandez Basurtuko ospitalean hil zen, 15 egunez koman izan ostean. "Erregimen diktatorialak ez zion inolako eskubiderik aitortu. Bada, 40 urte igaro direnean, erregimen demokratikoak horiek ukatzen jarraitzen du", Ahaztuak elkarteak salatu duenez. Argazkian, Fernandez eta Muruetaren senideak 2009ko urriaren 31n egin zieten omenaldian / © Ahaztuak 1936-1977.
Oroitzapen Historikoaren Legea aplikatzeko ebaluazio batzordeak hartutako erabakiaren ostean, mobilizazio eta ekimen sorta prestatzen ari dira Ahaztuak 1936-1977 elkartea eta Anton Fernandezen senideak. Biharko kontzentrazioa izango da horietan lehenengoa. Izan ere, salatu dutenez, "surrealista bezain lotsagarriak diren irizpideak erabiliz, frankismoaren biktima izaera zein dagozkion eskubide guztiak ukatu dizkio Anton Fernandez Elorriagari batzorde horrek".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun