Plentziako eskolak irakasle murrizketa jasan dezakeela salatu dute bertoko gurasoek
Eusko Jaurlaritzako Hezkuntza Sailak burutzen ari den "langile murrizketak" Plentziako eskolan eragina izango duela ohartarazi du tokiko guraso elkarteak. Datorren ikasturteko langile zerrenda ez dute jaso oraindik baina, aita-amek adierazi dutenez, "Haur Hezkuntzan irakasle bat gutxiago" izango dute, ikasleen laguntzarakoa alegia. Bestalde, kritikatu dutenez, "gimnasia orduak murriztu ditu" gobernuak eta ondorioz, beste irakasle bat galtzearen beldur dira. "Etorkinei laguntza ematen ari den irakaslea ere galdu dezake", gaineratu dutenez. Bestalde, guraso elkarteak jakinarazi duenez, "Lehen Hezkuntzan gaixorik dauden irakasleak ez dituzte bost egun pasa arte ordezkatuko. Horrek esan nahi du, eskolako irakasleek egin beharko dutela ordezkapen hori". Argazkian, Isabel Celaa Eusko Jaurlaritzako Hezkuntza sailburua / cc-by-nc-sa Agirregabiria
Eskolako irakasle batek aipatu duenez, "murrizketa neurri hauek baliabideetan 15-20 urte atzera egitea suposatzen du. Eta ikasketa buruzagiak esan digunez, murrizketa hauek batez ere laguntza gehien behar duten ikasleek igarriko dituzte, ez baita egongo ikasleei laguntza bereziak emateko irakaslerik". Bertoko Zuzendaritzak langile murrizketen aurkako idazkia sinatu du. Bestalde, Eskola Kontseiluak beste idazki bat prestatu du Hezkuntza Sailera bidaltzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun