Zubilleta herri ikastetxeko autobus zerbitzuaz galdetu dio Celaari Ezker Batuak
Algortako Zubilleta herri ikastetxeko umeak garraiatzen dituen autobus zerbitzuaren etorkizunaz galdetu du Eusko Legebiltzarrean Ezker Batuak. Izan ere, Mikel Arana legebiltzarkideak zerbitzu hori kenduko den ala mantenduko den argitzeko eskatu dio idatziz Isabel Celaa zuzentzen duen Hezkuntza Sailari. Azken egunotan, zerbitzu publikotan iragarri diren murrizketek ikastetxeari zerbitzua ematen dion garraioaren desagerpena ekar lezakete eta bere kezka agertu dute Zubilletako gurasoek. Aipatu garraioaren kontratazioa lau urtero sinatzen da eta aurten amaituko da azken hitzarmena. Horregatik, linea kenduko den argitzea eskatu du Aranak, horrela izango balitz zeintzuk izan dira Hezkuntzak erabilitako irizpideak ere ezagutu nahi du legebiltzarkide federalistak. Azkenik, Zubilletako ikasleen gurasoei matrikula garaian zerbitzuaren balizko desagerpenaren berri zergatik ez zaie eman jakin nahi du Aranak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun