Gizon bat atxilotu dute Erandion bikotekide ohiari herio-mehatxua egitea leporatuta
Lau gizonezko atxilotu ditu Ertzaintzak azken 24 ordutan, bikotekideari eraso egin diotelakoan, Eusko Jaurlaritzaren Herrizaingo Sailak jakinarazi duenez. Besteak beste, atzo arratsaldean 36 urteko gizon bat atxilotu zuten Erandion, bikotekide ohiari herio-mehatxua egitea eta baimenik gabe gidatzea egotzita. Ertzaintzak goizean izan zuen gertakarien berri, Kataluniako larrialdietarako zerbitzuak emandako abisu baten bidez, Herrizaingo Saileko iturriek zabaldu dutenez. Biktimaren aitak Bartzelonako larrialdietarako zerbitzuak eta Polizia ohartarazi berri zituen. Izan ere, suhi ohiak alaba hil egingo zuela jakinarazi ei zion telefonoz. Gainera, emakumea bizi den tokira, Erandiora, errepidez zihoala adierazi omen zion suhi ohiak biktimaren aitari. Ertzaintzak dispositiboa abiatu zuen segituan, emakumezkoa aurkitzeko eta babesteko, eta mehatxuen ustezko egilea atxilotzeko. Argazkian, emakumeenganako indarkeriaren kontrako elkarretaratzea eskualdean.
Agenteek emakumezkoa aurkitu eta polizia egoitza batera eraman zuten. Bertan, biktimak salaketa jarri eta babesa eskatu zuen. Denbora gutxira, patruila batek susmagarria atzeman zuen Erandion, emakumea bizi den etxearen inguruetan, Bartzelonatik heldu berri zenean. Herio-mehatxuen delitu bat leporatzeaz gain, bide segurtasunaren kontrako delitu bat ere egotzi zioten, gidabaimenik gabe gidatzeagatik. Atxilotua epailearen esku geratu zen, beharrezko polizia-eginbideak amaitu ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun