Berangoko Udaleko Obra eta Zerbitzu Arloak turismo panela jarri du Berangoetako kultur etxeko plazan. Aldeetako batek Uribe Kostako informazioa ematen du eta besteak Berangori buruzkoa. "Bisitariei gure udalerriko interes-guneen irudi orokor bat eskaintzea da helburua", udal iturriek zehaztu dutenez. Jata-Ondo elkarteak sustatuta eta koordinatuta, eskualdean turismoa bultzatzeko egitasmoaren barruan kokatzen da ekimena. Besteak beste, komunikabideetan zein turismo azoketan oihartzuna izatea eta eskualdeko intereseko elementuak balorean jartzea barnebiltzen ditu programak. Uribe aldeko Landa Garapen Elkartea da Jata-Ondo. Txorierri, Mungialdea eta Uribe Kostako 23 udalerrik osatzen dute, eskualdeko edo udalerrietako landa eremuarekin harremana duten beste hainbat erakunderekin batera. Azken horien artean dira, besteak beste, lehen sektoreko elkarteak, kooperatibak eta sindikatuak. Argazkian, eskualdeko turismo bulegoetako bat / © Joseba Zubiaur - Sopelako Udala.
Eskualdearen garapen integralari lagundu nahi dio elkarteak, landa eremu eta udalerrietan begirada jarriz, eta horri eragiten dioten esparru guztietan jardunez, Eusko Jaurlaritzaren Landa Garapenerako Legeak jasotakoaren arabera. Jata-Ondok dagozkion garapen egitarauak lantzen ditu. Gaur egun indarrean dagoen programan, bost ardatzetan sailkatuta daude ekinbideak: lehen sektorea, turismo garapena, eskualde kohesioa, bizi-kalitatearen hobekuntza eta landa eremuetako jardueraren dibertsifikazioa. Berangoko Udala 2008tik da Jata-Ondo elkarteko kide. Ordutik, eskubide osoko kide bezala parte hartzen du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun