“Getxo Sea Week”, Getxoko Udalak antolatutako Itsas Asteak, egitarau zabala (25 jarduera baino gehiago) eskainiko du datorren astean, ekainaren 21etik 27ra, Imanol Landa alkateak eta Aitor Soloeta Turismo eta Sustapen Ekonomikorako zinegotziak gaurko prentsaurrekoan aditzera eman dutenez. Bizkaia Zubiaren ondoan kokatutako olagarro puzgarri erraldoiak eta Getxoko sarreretan ipinitako hainbat banderatxok iragartzen dute jada ekimen turistiko hori gertu dagoela. Landak adierazi duenez, “gure kostaldea eta itsas ingurua eta baita gure udalerriaren ondare arkitektonikoa ere gordetzen eta goraipatzen dituzten jarduera batzuen bitartez, batez ere familiei zuzendutakoak, udalerriaren sustapen ekonomikoa bultzatzea lortu nahi da”. Argazkian, Imanol Landa eta Aitor Soloeta Bizkaia zubiaren ondoan olagarro puzgarri erraldoiarekin / © Getxo.net.
Jarduera guztiak itsasertzaren 3,5 kilometroko luzeran egingo direla esan du Aitor Soloetak; lau agertoki nagusietan: Bizkaia Zubian, Txurruka moilaren monumentuko pasealekuan, Kirol Portuan eta Portu Zaharrean. “Besteak beste, ikusi ahal izango dira: Kraken-munduko txibiarik handienaren erakusketa, Zirgarien antzezkizuna, bisita turistikoak eta antzeztutako bisitak, garaiko azoka, antzinako argazkien erakusketa, garaiko Dantza Aretoa, San Joseren eraikinean, ibilbideak tren turistikoan, Etxe Handien paseo gidatua, urpeko astearen ospakizuna, estatuko itsas akuariozaleen topaketa eta hainbat kirol jarduerak, besteak beste, belaontzien estropadak eta itsas waterpolo txapelketa”, zehaztu duenez. Halaber, "mila plater txibierro solidario" dastatzeko aukera egongo da eta sardina jana bi izango dira. Era berean, “Getxo Sea Week ekimena sendo lantzen ari dira bertoko Merkataritza Mahaian, udalerrian aurten sortutako elkargune publiko-pribatua. Establezimendu komertzialak eta ostalaritzakoak ekimena bultzatuko dute euren lokaletan jarritako bereizleekin. Eta jarduerak egingo diren agertokietatik hurbilago daudenek, Getxoko planoak banatuko dituzte, non merkataritza aldeak markatuta agertzen diren”, azaldu du Soloetak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun