Eusko Jaurlaritzako Larrialdiei Aurre Egiteko eta Babes Zibileko Zuzendaritzak jakinarazitako alerta laranja eta emergentzia aurreko egoeraren aurrean, Imanol Landa alkateak larrialdi plana jarri du indarrean Getxo udalerrian. Udal agintariak gaur goizean bertan “krisi mahaia” bildu du, aurreikusitako eguraldiaren eboluzioagatik beharrezko izatekotan prebentzio eta jardueren dispositiboak prest egon daitezen. Ildo horretan gune arriskutsuak zaintzeko neurriak jarri dituzte martxan eta, behar izatekotan, giza taldeak ere antolatuta daude, tokiko iturriek zehaztu dutenez. Era beran, herritarrei gogoratu diete, prebentzio bezala, urez betetzeko arriskua duten garajetan eta Gobela ibaiaren ondoan autoak ez uzteko. Udalak herritarrei hedabideen albisteei eta udal web guneari (www.getxo.net) adi egotea eskatu die, aurreikusitako euri jasen eboluzioa ezagutzeko. Leioako Udalak ere badaezpadako neurriak hartu ditu eta herritarrei kontuz ibiltzea gomendatu die, batez ere errepidean. Agintari leioaztarrek ere uholdeak eman daitezkeen zonaldeetatik autoak kentzea eskatu dute. Argazkian, larrialdi zerbitzuak adi, 2009ko urtarrilaren 27ko alerta egoeraren ondorioz.
Eusko Jaurlaritzako Herrizaingo Sailak alerta horia ezarri du gaurko, eta laranja biharko. Hala ere, eguraldia okerrera omen doanez, azken hori aurreratzea erabaki dute. Iragarri dutenez, metro koadroko 80 litro ur jaso daitezke 24 ordutan. Halaber, bihar, metro koadroko 110 litro euri izan daitekeela ohartarazi dute. Denboraleak atzo utzi zizkigun lehen euriteak, baina badirudi oraingoz ez dutela arazo larririk eragin. Adibidez, puntu beltz ohikoenetako batean, Gobela ibaian, hain zuzen ere, ur emaria maila normalean dago, gau osoan euria egin badu ere, eta ez dago uholde arriskurik une honetan. Denboralea bi faktorek eragin dute: alde batetik, Euskalmet Euskal Meteorologia Agentziatik azaldu dutenez, aire hotz masa batek ekarritako desegonkortasunak, eta bestaldetik, Mediterraneo itsasoan eratu den ekaitz batek. Herrizaingo Sailak alertaren berri eman die udalei, larrialdi zerbitzuei eta zerbitzu publikoa eskaintzen duten enpresei, neurriak har ditzaten. Eguraldiari buruzko informazio gehiago izateko, www.euskadi.net/112 edota www.euskalmet.net web guneetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun