"Bai Udalbiltzari Bai Euskal Herriari" lelopean eta Udalbiltzako auzipetuei babesa emanez, elkarretaratzeak izan ziren hainbat herritan larunbat eguerdian. Besteak beste, Algortako Telletxe plazan egindako kontzentrazioan 30 bat lagun elkartu ziren, tartean ezker abertzaleko, Eusko Alkartasuneko eta Aralarreko kideak zirela. Aurreko egunean Getxo udalerriko Bai Udalbiltzari Babes Taldearen aurkezpen publikoa egin zuten, arratsaldez, Villamonte kaleko kultur etxean. Hain zuzen ere, toki berean jarri dute hurrengo batzarrerako ordua: astelehenean, ekainak 21, 19:00etan. Sopelan, berriz, udaletxearen aurrean egin zuten, larunbatean, Udalbiltzaren aurka Madrilen egingo duten epaiketa salatzeko elkarretaratzea. Bertan, tokiko udal erakundean diren eta izan diren zinegotzi ezberdinek parte hartu zuten, Sopela.net agerkari digitalak adierazi duenez. Bildutakoak herriko kaleetatik ibili ziren auzi horren salaketa eginez. Orriak banatzeaz gain, kotxeko megafoniarekin epaiketa horren nondik norakoak salatu zituzten. Argazkian, Algortako kontzentrazioa.
Udalbiltza auzian 22 lagun, tartean hainbat herritako alkate eta zinegotzi, prozesatu dituzte "erakunde terroristako kide izatearen balizko delitua" leporatuta. Auzigai dituzten eginkizunak, baina, Udalbiltzako Batzorde Eragileko kide nahiz langile gisa burututakoak dira. Fiskalak auziperatu bakoitzarentzat 10 urteko espetxe zigorra eskatzen du, 10 urtetan lan edo kargu publiko bat betetzeko debekua eta kostak ordaintzea, ustez erakunde terroristako partaide izategatik. Gainera, lau auzipeturentzat, 5 urteko espetxe zigor gehitua, 12 urtetako erabateko inhabilitazioa eta kostak ordaintzea eskatzen du fiskalak, fondo publikoen erabilpen bidegabea ere egotzita. Bestalde, Dignidad y Justicia delako elkarte ultraeskuindarrak, akusazio partikular gisa, auziperatu bakoitzarentzat 14 urteko espetxe zigorra, 20 urtetako erabateko inhabilitazioa eta kostak ordaintzea eskatzen ditu. Diru publikoaren erabilpen bidegabea egotzitakoei, berriz, 8 urte gehiagoko espetxe zigorra, 20 urtetako erabateko inhabilitazioa eta kostak ordaintzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun