Udako Euskararen Eguna egingo dute larunbatean Gorlizen
2010ko eka. 16a, 15:38
Larunbat honetarako, ekainak 19, Udako Euskararen Eguna antolatu du Gorlizko Udalak. Gauzak horrela, 11:00etatik 13:00etara, puzgarriak eta jolasak izango dituzte txikiek, "Euskaraz olgetan" ekimenaren barruan. Eguerdiko ordu batetan, berriz, “Irriparra barra-barra” ikuskizuna eskainiko du Azkona pailazo taldeak, 2 eta 12 urte arteko neska-mutilei zuzenduta. Arratsaldeko txalaparta tailerrari dagokionez, 5 eta 14 urte arteko umeentzat izango da, 17:00etatik 19:00etara. Hori bukatuta, dantzaldia eskainiko du Auskalo Non taldeak. Udal iturriek zehaztu dutenez, ekintza guztiak Iberrebarri plazan izango dira eta euria bada, pilotalekuan. Bestalde, Araba Euskaraz jaialdira joateko autobusa jarri du Gorlizko Kultur Etxeak. Ikastola arabarren festa handia igande honetan, hilak 20, izango da Agurainen. Argazkian, Auskalo Non erromeria taldeak alaituko du Udako Euskararen Eguna / © Auskalo Non.Orotara, 55 toki izango dira Araba Euskarazerako autobusean. Gorlizen erroldatutakoek 5 euro ordaindu beharko dituzte eta kanpokoek horren bikoitza, 10 euro. Izena emateko Gorlizko Kultur Etxera (946 774 000 / gorliz[abildua]gorliz.net) jo beharko dute interesa dutenek. Agurainerako garraioa goizeko 9etan abiatuko da. Bueltatzeko ordua, berriz, 21:00etan jarri dute, Gorlizen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun