Getxo Antzoki berriaren proiektuaren hirugarren fasearen lehenengo jarduera onartu berri du Tokiko Gobernu Batzarrak; lur-arrasetik beherako egiturari dagokiona, alegia. Lan horien iraupena 13 hilabetekoa izango da eta uda ostean hastea aurreikusi dute. Fase horren aurrekontua 3.408.000 eurokoa da, eta Getxo Antzokia eta Musika Eskolaren sotoaren hiru solairuen egitura eta zimenduak jartzean datza, udal iturriek zehaztu dutenez. Etorkizuneko eraikinaren egitura eta zimendatzea zehazten dituen agiri tekniko-exekutiboa da proiektu berri horren ardatza. Horrenbestez, hormigoi armatuzko elementuak jarriko dituzte, betoi-masa bertatik bertara botata zein aurrez eraikitako pieza handiak ipiniz, lur-azpiko gelen tokiak estaltzen dituzten argien gainean. Argazkian, Getxo Antzoki berria eraikitzeko egiten ari diren obrak / © San Nikolas Auzo Elkartea.
3A izenez ezagutzen den fasearen onarpenarekin, bideratuta daude jada lur-azpiko lan guztiak. Fase horren ostean, lur-arrasetik gaineko elementuak eraikitzeari ekingo diote: elementu metalikoekin eta arinekin egingo den 3B izeneko fasea, alegia. Laugarren eta azken faseak eraikineko instalakuntzetako barruko eta kanpoko elementuak (itxierak, trenkada-multzoa, eraikineko instalakuntzak eta bukaerak...) amaitzea ekarriko du. Obrak inguruaren urbanizazioarekin, zolaketarekin, hiri-altxariekin, argiztapen publikoarekin, lora-zaintzarekin eta abarrekin bukatuko dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun