Ostiral eta larunbat honetan, ehunka lagunek parte hartuko dute Erandioko Unbe mendian izango den motorzaleen topaketan. Aurtengoa, Moto Astrabu klubak antolatzen duen hirugarrena da. Akarlanda parkera "hiru mila bat partaide" hurbilduko direla uste dute antolatzaileek. Bertan, Euskal Herri zein Espainia osoko motorzale taldeak izango dira. Besteak beste, kontzertuak, sari banaketak eta kostaldean zeharreko ibilaldia prestatu dituzte. Gainera, "motoziklismo munduko piloturik goraipatuena" ere gerturatuko da Erandio ingurura: Rondaldo Stuntmanek bi ikuskizun eskainiko ditu Astrabuduan. Topaketan parte hartzeko, tokian bertan izena eman beharko da, 5 euro ordainduta. Akarlanda parkera bertaratutako lagunek euren kanpin dendak jartzeko tokia izango dute, bertan lo egin dezaten. Argazkian, 2008ko abuztuaren 9an dozenaka motorzale batu ziren Astrabuduako San Lorentzo jaietan, errepide bazterreko hesiek motor gidariei dakarkieten arriskuaz ohartarazteko.
Inskripzioak bihar bertan hasiko dira, 19:00etatik 21:00etara. Ondoren, 21:30ean, kontzertua izango da, tartean txorizoa dastatzeko aukera izango dutela. Segituan, Travelling taldeak joko du. Larunbatean, goizeko 10etan egingo dute heldu berrientzako izen-ematea. Eguneko jarduerak 11:00etan hasiko dira. Ordu horretan, Erandioko Astrabuduara hurbilduko dira motorzaleak, bertan poteoa egiteko asmoz. Eguerdian, Ronaldo Stuntmanek bere lehenengo erakustaldia egingo du Josu Murueta plazan. Brasildarrak 18 urte daramatza Stunt Riding-a praktikatzen eta 2001ean bere herrialdeko lehiaketa nazionala irabazi zuen. Espektakuluaren ostean, Akarlandara bueltatuko dira motorzaleak paella jana egiteko. Arratsaldez, Bakioraino joango dira kostaldetik eginiko ibilaldian. Bertan 01 tabernan deskantsatu eta 19:00etan Erandiora bueltatuko dira, aldean errepide bazterreko hesien kontrako banderatxoak eramanez. Bueltan, brasildarrak bere bigarren saioa egingo du eta, ostean, sariak banatuko dituzte ekimenean parte hartu dutenen artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun