Atzo jasotako uholdeen behin behineko balantzeari dagokionez, alkate getxoztarrak aipatu du udalerria normaltasuna berreskuratzen ari dela. Makaletako Etorbideko errepidea eta Larrañazubiko sarbidea irekita daude eta Makaletako Etorbidean, Larrañazubin eta Akazia kalean kaltetutako etxebizitzetatik 8 lagun, azkenik, hoteletara eraman dituzte. Landak emandako datuen arabera, euriak 7 etxebizitzetan (3 Elkanon, 1 Akazian, 1 Larrañazubin eta 2 Makaletako Etorbidean); 9 garajetan (1 Akazian, 1 Makaletan eta Bizkerreko 26tik 32ra artekoetan); Salsiduko trasteleku batean, Makaletako soto batean, Elkanoko atalondo batean eta Kale Nagusiko 15. zenbakiko saltoki batean izan du eragina. Fadurako udal kiroldegian ez da kalterik izan eta instalazioak ireki dituzte gaur, barruko igerilekuak izan ezik, ur berorik ez baitago. Motoponpak sartu zituzten atzokoan Elkanoko zein Akazietako zenbait garajetan. Horrez gain, fatxada zati batzuk erori eta adar eta zuhaitz batzuk jausi ziren. Udaltzaingoak 30 bat aldiz jardun zuen atzo goizeko 9etatik 22:30era artean.
Hartutako neurriak
Alkateak, atzo bizi izandako krisi egoeraren aurrean kaltetutako auzotarrek erakutsitako "sendotasun eta ardura" nabarmendu ditu. Aurrekoetan bezala, berriro esan du, "aspertuta eta nekatuta gaudela era honetako egoerak pairatzeaz, gehiago edo gutxiago, eguraldiaren eta errekan duen eraginaren arabera”. Hartutako neurriekin batera, alerta egoera ezarri aurretik, udal Larrialdirako Plana eta Krisi Mahaia abiatu izanak eta Udalak hartutako beste hainbat neurrik, atzoko uholdeen ondorioak gutxitu dituzte, Landaren arabera. Atzo metro koadroko 107 litro euri izan ziren (2008ko ekainean izandako 72,6ren aldean). Udal Larrialdirako Planaren harira abiatutako jardueretan 130 lagunetik gora parte hartu zuten eta 50tik gora ibilgailu mobilizatu zituzten.
Larrialdi plana desaktibatuta
Bitartean, Eusko Jaurlaritzako Herrizaingo Sailak desaktibatu egin du Uholdeetarako Larrialdi Plan Berezia ibaien ibilguen egoera eta "aldeko" bilakaera meteorologikoa ikusita. Hala ere, alerta horia martxan dago oraindik euriarengatik, eta egoeraren eta uholdeek kalteturiko zonaldeetako lanen "etengabeko jarraipena" egiten ari da. Herrizaingo Sailak prentsa ohar batean jakinarazi dutenez, Uholdeetarako Larrialdi Plan Berezia desaktibatzearen arrazoia ibaien ibilguen orain egoera eta eguraldiaren "aldeko" bilakaera dira, ez baita espero euri-erregimenaren okertzea. Hala ere, Larrialdiei Aurre egiteko Zuzendaritza egoeraren "etengabeko jarraipena" egiten ari da, eta uholdeek gehien kalteturiko zonaldeetan ere lanean jarraitzen dute. Bestalde, Euskalmet Meteorologiaren Euskal Agentzia alerta horia mantendu du euriarengatik Euskal Autonomia Erkidegoan.
Gobelan egindako lanek uholdeen kalteak arindu dituztela uste du Getxoko alkateak
Uholdeengatik atzo bizi izandako gertaera berriek balio izan behar dute, Imanol Landa Getxoko alkatearen iritziz, “Eusko Jaurlaritzak Gobela ibaiaren gaineko proiektu orokorra lehentasunezkotzat eta ukaezintzat jo dezan”. Hori lortu ahal izateko lanean jarraitzeko bere konpromisoa berretsi du udal agintariak, "soilik proiektu orokor hori gauzatuz gero aurre egin ahal izango baitzaio Getxon dugun uholde arriskuari eta euria gogor botatzen duenean ibaia hazten dela ikusten dugun bakoitzean sortzen zaizkigun larritasun eta egonezinari”. Landaren ustez, Jolasetako zubia botatzeko lanak eta Salsidukoan zein Gobelako ibaiertzak zabaltzeko egindako jarduerak “erabakigarriak" izan dira duela bi urteko egoera errepika ez zedin. "Aurreratutako lan hauek, Uholdeetako Batzorde Berezian, Udalak, Gobernu taldeak, Udalbatzak, auzotarrek beraiek, inork baino gehiago bultzatu baitute proiektu hau, eta Uraren Euskal Agentziak berak egindako lanaren emaitza izan dira”, adierazi du alkateak. Argazkian, atzo bizi izandako euriteek Gobela ibaia topera ibiltzea ekarri zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun