Eric Sardinas gitarristak eta abeslariak abiatuko du bihar Getxoko 22. Nazioarteko Blues Jaialdia. Kontzertuak lehenengo aldiz izango dira Algortako Biotz Alai plazan eta bertan ariko da artista estatubatuarra 21:00etatik aurrera, Big Motor bere taldearekin batera. Bihar, gainera, laguntzaile bikaina izango du taula gainean estatubatuarrak: Raimundo Amador, flamenko musikako gitarra-jotzailerik aipagarrienetakoa. Entzuten dituen soinu guztiak barneratzeko gaitasunari esker, flamenkoa beste musika estiloekin uztartu izan dituen aitzindarietakoa da Amador. Horrela, bera izan zen fusio arloan lehendabiziko urratsak eman zituzten talde esanguratsuen sortzailea: Veneno eta Pata Negra. Sardinasi dagokionez, (1970, Fort Lauderdale, Florida, AEB) sei urte besterik ez zituela hasi zen musikaren munduan, ikuspegi erabat bitxiarekin, hasi ere: ezkerra izan arren, gitarra normaltasun osoz jotzen zuen eskuineko eskuarekin eta, horregatik, neurri handi batean, teknika oso espezializatua landu ahal izan du. Argazkian, Eric Sardinas / © Getxoko Kultur Etxea.
Hala, "Teat Me Right" (1999) hasierako lanean nola "Devil's Train" (2001) bigarren lanean, ondo baino hobeto erakutsi zuen dobro gitarraren (resofonikoa) danbada elektronikoa, blues tradizionalarekiko betidanik eduki izan ohi duen errespetua galdu gabe. Horren erakusgarri dira, esaterako, ahaztuta zeuden zenbait abestiren bertsioak, blues klasikoko artista katalogorik ateratakoak. Era berean, lan horietan Johnny Winter edo Honeyboy Edwards bezalako artisten eragina nabaria da. "Black Pearls" (2003) bere azken-aurreko lanaren bidez ordura arteko bideari ekin zion, betiere, bluesaren inguruko aurreiritziak hautsi nahian eta harago joan nahian. "Eric Sardinas & Big Motor" azken diskoan, bluesaren erritmo tradizionalek tartea egin diote Texaseko rockari, gospel eta soul ukitu batzuekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun