Asteburuan hasiko da Euskal Bodyboard Zirkuitua
2010ko eka. 18a, 14:16
Azkenaldi honetan pairatutako olatu falta deigarria izan da benetan. Izan ere, bi hilabeteko atzerapena jasan du El Diario Vasco Euskal Bodyboard Zirkuituak. Baina, badirudi, orain dela egun batzuk finkatutako data berria mantenduko dela eta Euskal Herriko Surf Federazioko (EHSF) Sail Teknikoak konfirmatu berri duenez, asteburu honetan, ekainak 19 eta 20, hasiko da zirkuitua, Sopelako Atxabiribil hondartzan. 2009an maila goreneko txapelduna izandako Aritz Larrinaga sopeloztarra dugu rankineko buru. Gure bodyboarderrik onenetarikoa etxean jokatuko du gainera! Open A maila honetan beste izen handiko lehiakideak izango dira: euskaldunak ez ezik, Kantabria, Portugal eta Frantziatik etorritakoak ere, besteak beste. Goizeko 9tan hasiko da txapelketa eta olatuen arabera garatuko da asteburu osoan zehar. Argazkian, azkenaurreko proban garaipena eskuratu zuen iaz Aritz Larrinagak / © EHSF.Datorren hilabetean, Donostian egingo dute bigarren proba; urrian, Zumaian; eta berriro, Lemoizko zentraleko uretan amaitzea espero dute, abenduak aldera, aurten, itxarote epe luzeago bat finkatuko delarik, aukera gehiago izatearren. Open A mailaz aparte, Open B maila ireki bat, Neskak, Dropknee, Sub 18 eta Sub16ko mailak ere izango dira. Guztira, parte-hartze handia espero da. Ahalegin handia egin du EHSFk, El Diario Vasco Euskal Zirkuituko proba guztiak mantentzeko, hala nola, dirusariak. "Krisialdi garai honetan, inoiz baino gehiago eskertzen dugu gure laguntzaile eta babesleen lana, Euskaltel eta El Diario Vasco nagusi direlarik. Aurten ere, EHSFk Peñatxuri Surf Taldearen laguntza izango du antolakuntzan; alegia, rider bikainenen surf talde nagusietako bat", adierazi dute federaziotik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun