Leioan azken hilabeteotan ibilgailutan eta edukiontzitan piztutako suteak ikertzen jarraitzen dute
Ertzaintzako ikerketa talde batek lanean jarraitzen du Leioan azken zazpi hilabeteotan ibilgailutan eta edukiontzitan piztutako suteen egileak identifikatzeko. Ikerketan laguntzeko, Erandioko ertzain-etxeak zerbitzu telefoniko bat abiatu du, ikerketaren inguruan datu argigarriren bat eskaini dezaketen herritarrak harremanetan jar daitezen, Eusko Jaurlaritzaren Herrizaingo Sailak jakinarazi duenez. 2009ko abenduaren 6an jazo zen azken hilabeteotan Leioan izandako gertakarien artean larriena. Goizaldean, 20 edukiontzi erre zituzten Leioako toki ezberdinetan, eta, ondorioz, 9 ibilgailuk kalteak izan zituzten (19 edukiontzi eta 8 ibilgailu ziren orduan, polizia iturrien arabera); horietako lau erabat kiskali ziren. Besteak beste, Eneko Arruebarrena alkate leioaztarrak kale indarkeria ekintza zela iradoki zuen. Apirilaren 14an beste sute bat piztu zuten. Sei edukiontziri eman zieten su, eta sugarrek hiru ibilgailu kaltetu zituzten. Ekainaren 7an, 16:30ak aldera, bi edukiontzi erre zituzten Aldapa kalean, eta lau ibilgailuk kalteak izan zituzten. Suhiltzaileak azkar bertaratu ziren eta itzali zuten. "Sute hark auzotarrak asko beldurrarazi zituen, sugarrak oso handiak baitziren", Herrizaingo Sailak aipatu duenez. Argazkian, abenduan erretako ibilgailuetako batzuk / © Leioa.net.
Erandioko ertzain-etxeak ikerketa talde bat abian du, suteak argitze aldera. Gertakariari buruz, informazio argigarriren bat eskaini dezaketen herritarrei 946 079 076 telefono zenbakiaren bidez kasuaz arduratutako agenteekin harremanetan jar daitezen eskatu diete. Antzeko jazoerak gertatu izan dira Ezkerraldean, Sestaon hain zuzen ere. Ikerketa talde espezifiko batek suteen egilea aurkitzea eta atxilotzea lortu zuen kasu hartan. 2009ko urrian eta abenduan jazo ziren gertakariak, udalerrian zenbait sute piztu zituztenean nahita, besteak beste, Ametzaga zinean, institutu bateko aparkalekuan zeuden bost ibilgailutan, Makonzaga auzoko sastraka batzuetan eta zabor edukiontzi batean. Suteen egilea (16 urte) otsailean atxilotu egin zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun